٣٧٩٦٣۔۔۔ حضرت جابر (رض) سے مروی ہے کہ حضرت حاطب بن ابی بلتعہ نے اہل مکہ کو خط لکھا اور اس میں ذکر کیا کہ رسول اللہ (صلی اللہ علیہ وآلہ وسلم) ان سے جنگ کے لیے آنے والے ہیں۔ چنانچہ رسول اللہ (صلی اللہ علیہ وآلہ وسلم) کو (بذریعہ وحی) اس عورت کے متعلق آگاہ کیا گیا جو مذکورہ خط لے کر جارہی تھی۔ لہٰذا آپ (صلی اللہ علیہ وآلہ وسلم) نے اس عورت کی طرف (دوصحابیوں کو) بھیجا۔ اور انھوں نے اس کے سر کے بالوں میں سے وہ خط برآمد کرلیا۔ پھر حضور (صلی اللہ علیہ وآلہ وسلم) نے حضرت حاطب (رض) کو مخاطب ہو کر ارشاد فرمایا :
اے حاطب ! کیا تم نے یہ کام کیا ہے ؟ حضرت حاطب (رض) نے عرض کیا : جی ہاں۔ مگر یارسول اللہ ! میں نے ایسا کام رسول اللہ (صلی اللہ علیہ وآلہ وسلم) کو دھوکا دینے کے لیے کیا اور نہ مجھ میں منافقت ہے۔ بیشک مجھے خوب یقین ہے کہ اللہ عزوجل اپنے رسول کو غالب کرکے رہیں گے اور ان کے (دین و) حکومت کو مکمل فرماکررہیں گے۔ مگر بات یہ ہے کہ ان کافرین مکہ کے درمیان میں ایک کم حیثیت آدمی ہوں اور میرے اہل خانہ ان کے درمیان رہتے ہیں، اس لیے میں نے ارادہ کیا کہ ان کے ساتھ کچھ تعلق بنالوں۔ حضرت عمر (رض) نے حضور (صلی اللہ علیہ وآلہ وسلم) سے عرض کیا : میں اس کی گردن نہ اڑا دوں ؟
حضور اکرم (صلی اللہ علیہ وآلہ وسلم) نے ارشاد فرمایا : کیا تو بدر کے شریک آدمی کو قتل کرنا چاہتا ہے ؟
تجھے کیا معلوم شاید اللہ پاک نے اہل بدر سے ہم کلام ہوا ہو اور فرمایا ہو کہ تم جو چاہے کرو۔ (مستدرک الحاکم)