٣٨٠٩٤۔۔۔ (اسی طرح) حسن بن عبدالرحمن بن حاطب اپنے والد سے روایت کرتے ہیں کہ جب حضرت عمر بن خطاب (رض) نے جن لوگوں کو حرم کے پتھروں کی تجدید کے لیے بھیجا تھا آپ نے انھیں حکم دیا کہ وہ دیکھیں جو وادی حرم میں پڑتی ہے تو وہاں پتھر رکھ دیں اور اس پر نشان لگا کر اسے حرم کا حصہ بنادیں، اور جو وادی حل میں پڑتی ہے اسے حل کا حصہ بنادیں۔
فرماتے ہیں : جب حضرت عثمان بن عفان (رض) کا دور آیا تو آپ نے حج کے لیے قافلہ بھیجا، اور عبدالرحمن ابن عوف کو روانہ فرما کرا نہیں حرم کے پتھروں کی تجدید کا حکم دیا، عبدالرحمن (رض) نے قریش کا ایک گروہ روانہ فرمایا، جن میں حویطب بن عبدالعزی، عبدالرحمن بن ازھر شامل تھے، سعید بن یربوع کی نظر حضرت عمر کی خلافت کے آخری دور میں ختم ہوچکی تھی اور مخرمۃ بن نوفل کی نظر بھی حضرت عثمان کے دور خلافت میں چلی گئی تھی، یہ حضرات ہر سال حرم کے پتھروں کی تجدید کرتے تھے، جب حضرت معاویہ (رض) خلیفہ بنے تو آپ نے مکہ کے گورنر کو خط لکھا کہ وہ حرم کے پتھروں کی تجدید کرے۔ (رواہ الازرقی)