٣٨١٠٤۔۔۔ کثیر بن کثیر بن مطلب بن ابی وداعۃ سہمی اپنے والد کے پاس سے اپنے دادا سے روایت کرتے ہیں فرمایا : کہ سیلاب مسجد حرام میں حضرت عمر (رض) کے بالائی بندھ باندھنے سے باب بنی شیبہ کبیر سے داخل ہوتے تھے، تو سیلاب کبھی مقام ابراہیم کو اپنی جگہ سے بلند کردیتے اور کبھی کعبہ کے سامنے لے آتے، یہاں تک کہ حضرت عمر بن خطاب (رض) کے دور میں ام نہشل سیلا آیا، اور مقام ابراہیم کو اس کی جگہ سے بہا کرلے گیا اور وہ مکہ کے نچلے مقام میں ملا، پھر اسے لا کر کعبہ کے پردوں سے باندھ دیا گیا اور اس کے متعلق حضرت عمر (رض) کو لکھا گیا، آپ رمضان کے مہینہ میں گھبرائے ہوئے آئے، اس کا نشان مٹ چکا تھا سیلاب نے اسے مٹادیا تھا، حضرت عمر (رض) نے لوگوں کو بلایا، آپ نے فرمایا : میں اس بندے کو اللہ کا واسطہ دیتا ہوں جسے اس مقام ابراہیم کا علم ہے ! تو مطلب بن ابی وداعۃ نے کہا : امیر المومنین ! مجھے اس کا علم ہے، مجھے اس کا خدشہ تھا تو میں نے رکن کی جگہ سے اس کی جگہ تک کو ناپ لیا، اور اس کی جگہ سے حجر اسود تک اور اس کی جگہ سے زمزم تک کو مقاط (مضبوط بٹی ہوئی رسی) سے ماپ لیا تھا وہ میرے پاس گھر میں ہے، حضرت عمر (رض) نے ان سے فرمایا : میرے پاس بیٹھو اور مقام ابراہیم منگوانے کا حکم دیا، چنانچہ وہ آپ کے پاس بیٹھ گئے اور مقام ابراہیم لایا گیا، اسے لمبائی میں رکھا گیا تو اسے اس کی جگہ تک برابر پایا، آپ نے لوگوں سے پوچھا اور ان سے مشورہ لیا، لوگوں نے کہا : ہاں ! یہی اس کی جگہ ہے جب حضرت عمر (رض) نے اسے اچھی طرح جانچ لیا اور آپ کے نزدیک وہ ثابت ہوگیا تو اسے نصب کرنے کا حکم دے دیا، اور مقام ابراہیم کے نیچے ایک عمارت بناکر اسے موڑدیا تو وہ آج تک اپنی رسی کی جگہ پر ہے۔ (رواہ الازرقی)