٣٨٢١٨۔۔۔ حضرت عبداللہ بن حوالہ (رض) سے روایت ہے فرماتے ہیں : ہم رسول اللہ (صلی اللہ علیہ وآلہ وسلم) کے پاس تھے ہم نے آپ سے فقروعریانی اور بےسروسامانی کی شکایت کی، رسول اللہ (صلی اللہ علیہ وآلہ وسلم) نے فرمایا : خوش ہوجاؤ ! اللہ کی قسم ! مجھے تمہارے بارے میں بہتات سے زیادہ قلت کا زیادہ خوف ہے، اللہ کی قسم ! تم میں یہ چیز برقرار رہے گی یہاں تک کہ تمہارے لیے فارس، روم اور حمیر کی زمین فتح ہوگی یہاں تک کہ تین لشکر ہوں گے، ایک لشکر شام میں، ایک عراق میں، اور
ایک یمن میں ہوگا، یہاں تک کہ ایک شخص کو سو دینار دئیے جائیں گے پھر بھی وہ انھیں کم سمجھے گا۔
حضرت ابن حوالہ فرماتے ہیں : میں نے عرض کیا : یارسول اللہ (صلی اللہ علیہ وآلہ وسلم) ! شام کون جاسکتا ہے وہاں مینڈھیوں والے رومی ہیں ؟ تو رسول اللہ (صلی اللہ علیہ وآلہ وسلم) نے فرمایا : اللہ کی قسم ! اللہ تعالیٰ ضرور تمہیں فتح کرائے گا اور اس کا تمہیں خلیفہ بنائے گا۔ یہاں تک کہ ان کی ایک جماعت جن کی قمیضیں سفید اور ان کی گدیاں منڈی ہوئی ہوں گی کھڑے ہو کر تمہارے حبشی آدمی پر سایہ کریں گے۔ وہ (حبشی) انھیں جو حکم دے گا وہ کریں گے، اور اب وہاں ایسے مرد ہیں جن کی نظروں میں تم اونٹوں کی چونتڑوں میں پائے جانے والی چیچڑیوں سے زیادہ حقیر ہو۔
حضرت ابن حوالہ (رض) فرماتے ہیں : میں نے عرض کیا : یارسول اللہ ! میرے لیے پسند کریں اگر مجھے وہ زمانہ مل جائے ؟ آپ نے فرمایا : میں تمہارے لیے شام پسند کرتا ہوں، کیونکہ وہ اللہ تعالیٰ کا پسندیدہ علاقہ ہے اور اسی کی طرف اس کے برگزیدہ بندے چنے جاتے ہیں۔ اے اہل یمن، شام کو نہ چھوڑنا، کیونکہ اللہ تعالیٰ کی پسندیدہ زمین شام ہے جو نہ چاہے وہ اس کے یمن میں چلا جائے اور اس کے حوضوں کا پانی پیئے، کیونکہ اللہ تعالیٰ میرے لیے شام اور اس کے باسیوں کا ذمہ دار ہے۔ (الحسن بن سفیان، حلیۃ الاولیاء، ابن عساکر)