٣٨٢٢١۔۔۔ حضرت عبداللہ بن حوالہ ازدی (رض) سے روایت ہے فرمایا : ہمیں رسول اللہ (صلی اللہ علیہ وآلہ وسلم) نے بھیجا کہ ہم لوگ پیدل غنیمت حاصل کریں ہم واپس آگئے اور کچھ بھی حاصل نہ ہوا، آپ نے ہمارے چہروں سے عیاں مشقت کو بھانپ لیا ہمارے درمیان کھڑے ہو کر آپ نے فرمایا : اے اللہ ! انھیں میرے حوالے نہ کر کہ میں ان سے کمزور پڑجاؤں اور نہ انھیں ان کے حوالے کر کہ یہ عاجز ہوجائیں اور نہ لوگوں کے حوالے کر کہ انھیں مخصوص کرلیں (کہ یہ فقیر لوگ ہیں)
پھر فرمایا : ضرور شام وروم اور فارس فتح ہوں گے، یا فرمایا : روم وفارس، یہاں تک کہ تم میں سے ایک شخص کے اتنے اتنے اونٹ ہوں گے اتنی بکریاں ہوں گی، یہاں تک کہ تم میں سے کسی کو سو دینار دئیے جائیں گے تو وہ انھیں بھی کم سمجھے گا۔ پھر آپ نے اپنا ہاتھ میرے سریاکھوپڑی پر رکھ کر فرمایا : ابن حوالہ ! جب تم دیکھو کہ خلافت پاک زمین میں آگئی ہے تو اس وقت زلزلے، غم پریشانیاں اور دوسرے بڑے کام قریب ہوں گے، اور قیامت اس دن لوگوں کے اس سے زیادہ نزدیک ہوگی جیسے یہ ہاتھ تمہارے سرکے قریب ہے۔ (رواہ ابن عساکر)