٣٨٧٤٠۔۔۔ میں دجال سے زیادہ تمہارے بارے خوفزدہ ہوں، اگر وہ نکل آیا اور میں تم میں ہوا، تو میں تمہاری طرف سے اس سے جھگڑوں گا، اور اگر وہ میری عدم موجودگی میں نکلا تو ہر آدمی اپنا آپ جھگڑا کرے گا اللہ تعالیٰ ہر مسلمان پر میرا خلیفہ ہے۔ وہ جوان گھنگھریالے بالوں والا ہوگا اس کی ایک آنکھ گویا پکا انگور کا دانہ ہے یوں لگتا ہے کہ وہ عبدالعزیز بن قطن کی طرح ہے تم میں سے جس کسی کو وہ مل جائے وہ اس کے سامنے سورة کہف کی ابتدائی آیات پڑھے، وہ شام و عراق کے درمیان خالی جگہ میں نکلے گا وہ دائیں بائیں پھرے گا، اللہ کے بندو ! ثابت قدم رہنا۔ ہم نے عرض کیا : یارسول اللہ ! وہ زمین میں کتنا عرصہ رہے گا ؟ آپ نے فرمایا : چالیس دن، ایک دن سال بھرکا اور ایک دن مہینے کا، اور حصہ کی طرح کا، باقی دن تمہارے عام دنوں جیسے ہوں گے۔
ہم نے عرض کیا : یارسول اللہ ! وہ دن جو سال کے برابر ہوگا اس میں ہمیں ایک دن کی نماز کافی ہوگی ؟ آپ نے فرمایا : نہیں ، اس کا اندازہ لگالینا، لوگوں نے عرض کیا : زمین میں اس کی تیزی کیسے ہوگی ؟ فرمایا : جیسے بارش کہ ہوا اسے دکھیلتی ہے وہ ایک قوم کے پاس آئے گا انھیں بلائے گا وہ اس پر ایمان لے آئیں گے اس کی بات مانیں گے آسمان کو حکم دے گا وہ برسائے گا زمین کو کہے گا وہ اگائے گی تو ان کی مویشی بچوں سے جلدی بڑے ہو کر، تھن دار اور شکم بار ہوجائیں گے۔
پھر وہ ایک قوم کے پاس آکر انھیں بلائے گا وہ اس کی بات کی تردید کردیں گے تو وہ لوٹ جائے گا صبح وہ تہی دست ہوں گے ان کے مال میں سے کچھ بھی ان کے پاس نہیں ہوگا، ایک ویرانے پر سے اس کا گزر ہوگا اسے کہے گا : اپنے خزانے نکال ! تو کئی طرح پے درپے اس کے خزانے نکلیں گے، اس کے بعد ایک نوجوان کو بلائے گا اسے تلوار مار کر دو ٹکڑے کردے گا جیسے نشانے پر وار کیا جاتا ہے، پھر اسے بلائے گا تو وہ اٹھ کر اس کی طرف آجائے گا اس کا چہرہ چمک رہا ہوگا اور وہ ہنس رہا ہوگا، وہ اسی حالت میں ہوگا کہ اللہ تعالیٰ مسیح بن مریم (علیہما السلام) کو بھیج دے گا چنانچہ وہ دمشق کی مشرقی جانب سفید مینارے پر دو شقوں کے درمیان دو فرشتوں کے (کندھوں) پروں پر ہاتھ رکھ کر اتریں گے۔ ان کے سر سے پانی ٹپک رہا ہوگا جب وہ سرجھکائیں گے اور پانی موتیوں کی طرح ڈھلکے گا جب وہ سر اٹھائیں گے، کسی کافر کے لیے حلال نہیں جو آپ کی مہک پائے اور مرے نہیں، اور آپ کی مہک جہاں تک آپ کی نظر پہنچے گی وہاں تک ہوگی، آپ دجال کو تلاش کرنے لگیں گے اور بالاۤخر لد کے دروازے پر مل کر اسے قتل کردیں گے، پھر عیسیٰ (علیہ السلام) ایسی قوم کے پاس آئیں گے جنہیں اللہ تعالیٰ نے اس سے محفوظ رکھا ہوگا ان کے چہروں پر ہاتھ پھیریں اور انھیں ان کے جنتی درجات بتادیں گے آپ اسی حالت میں ہوں گے اللہ تعالیٰ عیسیٰ (علیہ السلام) کی طرف وحی بھیجے گا : میں نے اپنے بندے نکال لیے ہیں جن کے مقابلہ کا کسی کو یارا نہیں، تو میرے بندوں کو طور کی طرف محفوظ کرلو، اس کے بعد اللہ تعالیٰ یاجوج ماجوج کو بھیجے گا ” وہ ہر اونچی جگہ سے پھسل رہے ہوں گے “ ان کا اگلا ریلہ بحیرۂطبریہ سے گزرے گا اس کا سب پانی ہڑپ کرلیں گے ان کا آخری گروہ گزرے گا تو کہیں گے : لگتا ہے یہاں کبھی پانی تھا، پھر وہ چلتے چلتے جبل الخمر تک پہنچ جائیں گے وہ بیت المقدس کا پہاڑ ہے کہیں گے : ہم نے زمین والے مار ڈالے چلو آسمان والوں کو ماریں، تو وہ آسمان کی طرف اپنے تیر پھینکیں گے اللہ تعالیٰ ان کے تیر خون آلود کرکے ان کی طرف لوٹائیں گے، اللہ کے (رسول) نبی (صلی اللہ علیہ وآلہ وسلم) اور آپ کے ساتھ ٹھہرے رہیں گے یہاں تک کہ ان کے لیے لہسن کا سر تمہارے آج کے کسی شخص کے سو دنیا سے بہتر ہوگا، اللہ کے نبی عیسیٰ (علیہ السلام) اپنے ساتھیوں کو اللہ تعالیٰ کی طرف راغب کریں گے (یعنی دعاکریں گے) تو اللہ تعالیٰ ان (یاجوج ماجوج) پر ایک کیڑا بھیجے گا جو ان کے گردنوں سے چمٹ جائے گا، صبح وہ سب ایک آدمی کی موت کی طرح مرپڑیں گے۔ اس کے بعد اللہ کے نبی عیسیٰ (علیہ السلام) اور آپ کے ساتھی (پہاڑ سے) زمین کی طرف اتریں گے، تو اس زمین کا ایک بالشت حصہ بھی اسا نہ ہوگا جہاں کی نعشیں، بدبو اور خون نہ ہوگا، اللہ کے نبی عیسیٰ (علیہ السلام) اپنے ساتھیوں کو اللہ کی طرف رغبت دلائیں گے تو اللہ تعالیٰ ان (یاجوج ماجوج) پر ایسے پرندے بھیجے گا جیسے بختی اونٹوں کی گردنیں ہوتی ہیں تو وہ انھیں اٹھا کر ایسی جگہ پھینکیں گے جہاں اللہ تعالیٰ چاہے گا، پھر اللہ تعالیٰ ایسی بارش بھیجے گا جس سے کوئی کچا پکا گھر نہیں بچے گا پس زمین کو دھوکر چمکدار چٹان کی طرح کردے گا۔
پھر زمین سے کہا جائے گا : اپنے پھل اگا اپنی برکات لا، چنانچہ اس روز ایک جماعت ایک انار کھائے گی اور اس کے چھلکے کے سایہ میں بیٹھے گی، اللہ تعالیٰ اونٹ بکری کے ریوڑ میں برکت دے گا، یہاں تک کہ ایک گابھن اونٹنی لوگوں کی بڑی تعداد کے لیے کافی ہوگی، اسی حالت میں وہ لوگ ہوں گے کہ اللہ تعالیٰ ایک پاکیزہ ہوا بھیجے گا جو انھیں ان کی بغلوں کے نیچے سے پکڑے گی اور ایماندار مسلمان روح قبض کرلے گی، اور برے لوگ رہ جائیں گے جو گدھوں کی طرح ایک دوسرے پر حملہ کریں گے انھیں پر قیامت قائم ہوگی۔ (مسند احمد، مسلم، ترمذی عن النواس بن سمعان)