٣٩٠٥١۔۔۔ قیامت کے دن میں انسانوں کا سردار ہوں گا، جانتے ہو ایسا کیوں ہوگا ؟ اللہ تعالیٰ اولین آخرین کو ایک کھلے میدان میں جمع کرے گا ایک بلانے والا انھیں اپنی آواز سنائے گا اور ایک آنکھ انھیں دیکھ سکے گی، سورج ان کے قریب ہوگا اور لوگ ناقابل برداشت غم و پریشانی میں مبتلا ہوں گے، کچھ لوگ دوسرے سے کہیں گے : اپنی حالت دیکھتے نہیں ؟ کیا تم اپنے بارے میں اپنے رب کے ہاں کسی کی شفاعت کے منتظر ہو ؟ تو کچھ لوگ ایک دوسرے سے کہیں گے چلو آدم (علیہ السلام ) کے پاس چلتے ہیں، وہ آدم (علیہ السلام) سے کہیں گے : آدم ! آپ ہمارے باپ اور انسانیت کے والد ہیں۔ اللہ تعالیٰ نے آپ کو اپنی قدرت سے پیدا کیا اور آپ میں اپنی (پیدا کردہ مخلوق) روح پھونکی، اور فرشتوں کو حکم دیا اور انھوں نے آپ کو سجدہ کیا ! اپنے رب سے ہمارے بارے میں شفاعت کریں، آپ ہماری کیفیت نہیں دیکھ رہے ؟ ہمارے بےچینی آپ کے سامنے ہے ؟ آدم (علیہ السلام) ان سے کہیں گے : میرا رب آج ایسا غضبناک ہوا ہے کہ اس سے پہلے ایسا ناراض نہیں ہوا، اور نہ ہرگز کبھی ایسا ناراض ہوگا، اس نے مجھے درخت سے روکا تھا لیکن مجھ سے غلطی ہوگئی۔ مجھے اپنی فکر ہے اپنی فکر ہے اپنی فکر ہے میرے علاوہ کسی کے پاس جاؤ، نوح کے پاس جاؤ ! وہ نوح (علیہ السلام) کے پاس آکر کہیں گے : اے نوح ! آپ اہل زمین کی طرف اللہ تعالیٰ کے پہلے رسول ہیں اللہ تعالیٰ نے آپ کا نام شکرگزاربندہ رکھا ہے ہمارے لیے اپنے رب سے شفاعت کریں، آپ ہماری کیفیت نہیں دیکھ رہے، ہماری حالت آپ کے سامنے نہیں ؟ تو نوح (علیہ السلام) ان سے کہیں گے : میرا رب آج ایسا غضبناک ہوا کہ اس سے پہلے ایسا ناراض نہیں ہوا اور نہ کبھی اس کے بعد ایسا غضبناک ہوگا میری ایک دعا تھی جو میں نے اپنی قوم کے لیے (بددعا کے طور) مانگ لی، مجھے اپنی فکر ہے اپنی فکر ہے اپنی فکر ہے میرے علاوہ کسی اور کے پاس جاؤ ابراہیم کے پاس جاؤ ! چنانچہ وہ لوگ ابراہیم (علیہ السلام) کے پاس آکر کہیں گے : اے ابراہیم ! آپ اہل زمین میں سے اللہ کے نبی اور خلیل ہیں ہمارے لیے اپنے رب سے سفارش کریں، آپ کو ہماری کیفیت نظر نہیں آرہی اور ہماری حالت آپ کے سامنے نہیں ؟ تو ابراہیم (علیہ السلام) ان سے فرمائیں گے میرا رب آج ایسا غضبناک ہوا کہ اس سے پہلے ایسا غصہ نہیں ہوا اور نہ کبھی اس کے بعد ایسا غضبناک ہوگا میں نے تین جگہ توریہ (بظاہر جھوٹ) کہا ہے مجھے اپنی فکر ہے اپنی فکر ہے اپنی فکر ہے میرے علاوہ کسی کے پاس جاؤ، موسیٰ کے پاس جاؤ !
چنانچہ یہ لوگ موسیٰ (علیہ السلام) کے پاس جاکر کہیں گے : اے موسیٰ ! آپ اللہ کے رسول ہیں اللہ نے آپ کو اپنی رسالت اور اپنے کلام کے ذریعہ لوگوں پر فضیلت دی، ہمارے لیے اپنے رب سے سفارش کریں، آپ ہماری کیفیت نہیں دیکھ رہے اور ہماری حالت آپ کے سامنے نہیں ؟ تو موسیٰ (علیہ السلام) ان سے فرمائیں گے : میرا رب آج ایسا غضبناک ہوا کہ اس سے پہلے ایسا غصہ نہیں ہوا اور نہ کبھی اس کے بعد ہوگا۔ مجھ سے ایک قتل ہوگیا تھا جسے قتل کرنے کا مجھے حکم نہیں تھا مجھے اپنی فکر ہے اپنی فکر ہے اپنی فکر ہے۔ میرے علاوہ کسی اور کے پاس جاؤ ! عیسیٰ (علیہ السلام) کے پاس جاؤ ! چنانچہ یہ لوگ عیسیٰ (علیہ السلام) کے پاس آکر کہیں گے : آپ اللہ کے رسول اور اس کے کلمہ ہیں جسے اس نے مریم کی طرف ڈالا اور اس کی روح (مخلوق) ہیں آپ نے پنگھوڑے میں لوگوں سے کلام کیا، ہمارے لیے اپنے رب سے سفارش کریں، کیا آپ کو ہماری کیفیت نظر نہیں آرہی ہماری حالت آپ کے سامنے نہیں ؟ عیسیٰ (علیہ السلام) ان سے فرمائیں گے : میرا رب آج ایسا غضبناک ہوا کہ ایسا پہلے نہیں ہوا اور نہ کبھی اس کے بعد ہوگا، مجھے اپنی فکر ہے اپنی فکر ہے اپنی فکر ہے میرے علاوہ کسی کے پاس جاؤ ! محمد (صلی اللہ علیہ وآلہ وسلم) کے پاس جاؤ، چنانچہ وہ لوگ محمد (صلی اللہ علیہ وآلہ وسلم) کے پاس آکر کہیں گے : اے محمد ! آپ اللہ کے رسول اور خاتم الانبیاء ہیں اللہ تعالیٰ نے آپ کی اگلی پچھلی خطائیں بخش دی ہیں۔ ہمارے لیے اپنے رب سے سفارش کریں، کیا آپ ہماری کیفیت اور ہم جس حالت میں ہیں نہیں دیکھ رہے ؟
چنانچہ میں چل کر عرش کے نیچے آؤں گا اور سجدہ میں گرپڑوں گا، پھر اللہ تعالیٰ میرا سینہ کھول دے گا اور مجھے ایسی محامد (اپنی تعریفیں) الہام کرے گا جو مجھ سے پہلے کسی کو الہام نہیں کی ہوں گی، پھر کہا جائے گا : اے محمد ! اپنا سراٹھاؤ ! مانگو تمہیں دیا جائے گا، سفارش کرو تمہاری سفارش قبول کی جائے گی، میں اپنا سراٹھاؤں گا اور عرض کروں گا، اے رب ! میری امت میری امت کو بخش دیجئے ! کہا جائے گا : اے محمد ! اپنی امت میں سے ان لوگوں کو جنت کے دروازوں میں سے داہنے دروازے سے داخل کردو جن پر کوئی حساب نہیں اور وہ دوسرے دروازوں میں لوگوں کے شریک ہیں۔ اس ذات کی قسم ! جس کے قبضہ قدرت میں میری جان ہے ! جنت کے دو چوکھٹوں کے درمیانی فاصلہ ایسا ہے جیسے مکہ اور ہجر کے درمیان ہے یا جیسے مکہ اور بصری کے درمیان ہے۔ (مسند احمد ، بخاری، ترمذی عن ابوہریرہ )