٣٩٠٥٤۔۔۔ قیامت کے روز اللہ تعالیٰ لوگوں کو جمع کرے گا تو ایمان والے اس وقت کھڑے ہوجائیں گے جب جنت ان کے نزدیک کی جائے گی، اس کے بعد وہ آدم (علیہ السلام) سے آکر کہیں گے : اے ہمارے باپ ہمارے لیے جنت کھلوائیے، وہ فرمائیں گے، میرے بیٹے ابراہیم خلیل اللہ کے پاس جاؤ، ابراہیم (علیہ السلام) فرمائیں گے : میں اس کا اہل نہیں، میں اس کے علاوہ کا خلیل ہوں، موسیٰ (علیہ السلام) کے پاس جاؤ جس سے اللہ نے کلام کیا، وہ موسیٰ (علیہ السلام) کے پاس آئیں گے وہ فرمائیں گے : میں اس کا اہل نہیں، تم لوگ عیسیٰ (علیہ السلام) کے پاس جاؤ جو اللہ کا کلمہ اور اس کی (مخلوق) روح ہے عیسیٰ (علیہ السلام) فرمائیں گے میں اس کا اہل نہیں محمد کے پاس جاؤ چنانچہ وہ محمد (صلی اللہ علیہ وآلہ وسلم) کے پاس آئیں گے وہ اٹھیں گے اور انھیں اجازت مل جائے گی پھر
امانت اور رشتہ داری کو چھوڑا جائے گا وہ دونوں پل صراط کے دائیں بائیں کھڑی ہوجائیں گی۔ اس کے بعد تمہارا پہلا گروہ بجلی کی طرح گزرے گا پھر ہوا کے جھونکے کی طرح پھر پرندے اور سواری کی طرح گزریں گے۔ لوگوں کو ان کے اعمال چلائیں گے تمہارے نبی پل صراط پر کھڑے کہہ رہے ہوں گے : اے رب سلامت رکھ، سلامت رکھو ! یہاں تک کہ لوگوں کے اعمال عاجز پڑجائیں گے پھر ایک شخص کو لایا جائے گا تو وہ سوائے گھٹنے کے کسی طرح نہ چل سکے گا، اور پل صراط کے دونوں پہلوؤں پر حکم کے پابند آنگڑے ہوں گے جنہیں جس کے بارے پکڑنے کا حکم ہوگا اسے پکڑلیں گے کوئی خراش کھاکر نجات پائے گا اور کوئی آگ میں گرجائے گا۔ (مسلم عن ابوہریرہ وحذیفۃ)