٣٩٠٥٣۔۔۔ قیامت کے روز اللہ تعالیٰ ایمان والوں کو جمع فرمائے تو وہ اس کا اہتمام کریں گے اور کہیں گے : اگر ہم اپنے رب سے سفارش کریں تو ہمیں اس جگہ سے نجات دے ، تو آدم (علیہ السلام) ان سے فرمائیں گے : میں اس کا اہل نہیں اور آپ کو اپنی وہ لغزش یاد آجائے گی جس کی وجہ سے وہ اپنے رب سے شرمائیں گے۔ اور وہ فرمائیں گے : البتہ تم نوح کے پاس جاؤ کیونکہ وہ زمین والوں کی طرف بھیجے ہوئے پہلے رسول ہیں، پھر وہ نوح (علیہ السلام) کے پاس آئیں گے وہ فرمائیں گے : میں اس کا اہل نہیں، انھیں اپنی لغزش یاد آئے گی کہ انھوں نے ایسی چیز کا سوال اپنے رب سے کیا تھا جس کا انھیں علم نہیں تھا جس کی وجہ سے وہ اپنے رب سے شرمائیں گے۔ البتہ تم لوگ رحمن کے خلیل ابراہیم کے پاس جاؤ وہ ان کے پاس آئیں گے وہ فرمائیں گے : میں اس کا اہل نہیں البتہ تم موسیٰ (علیہ السلام) کے پاس جاؤ وہ ایسا بندہ ہے جس سے اللہ نے کلام کیا اور اسے توراۃ دی، چنانچہ وہ موسیٰ (علیہ السلام) کے پاس آئیں گے وہ فرمائیں گے : میں اس کا اہل نہیں، اس شخص کا قتل یاد آجائے گا جسے انھوں نے ناحق قتل کردیا تھا تو وہ اپنے رب سے شرمائیں گے، البتہ تم عیسیٰ (علیہ السلام) کے پاس جاؤ وہ اللہ کا بندہ، اس کا کلمہ اور اس کی روح (مخلوق) ہے چنانچہ وہ عیسیٰ (علیہ السلام) کے پاس آئیں گے وہ فرمائیں گے : میں اس کا اہل نہیں، البتہ تم محمد (صلی اللہ علیہ وآلہ وسلم) کے پاس جاؤ وہ ایسے بندے ہیں کہ اللہ تعالیٰ نے ان کے اگلے پچھلے گناہ معاف کردئیے ہیں چنانچہ میں اٹھوں گا اور مومنوں کی دوصفتوں میں چل کر اللہ تعالیٰ کے سامنے حاضری کی اجازت طلب کروں گا مجھے اجازت مل جائے گی جب میں اپنے رب کا دیدار کروں گا تو اپنے رب کے لیے سجدہ میں پڑجاؤں گا پھر وہ جتنا چاہے گا مجھے سجدہ میں رکھے گا، پھر فرمائے گا : محمد ! سراٹھاؤ ! کہو تمہاری بات سنی جائے گی مانگو تمہیں دیا جائے گا شفاعت کرو تمہاری شفاعت قبول کی جائے گی میں اپنا سراٹھاکر اللہ تعالیٰ کی ایسی حمد کروں گا جو وہ مجھے سکھائے گا اس کے بعد میں شفاعت کروں گا، پھر میرے لیے ایک حد مقرر کی جائے گی جنہیں میں جنت میں داخل کروں گا پھر میں دوسری مرتبہ آؤں گا، اپنے رب کو دیکھ کر اس کے سامنے سجدہ ریز ہوجاؤں گا اور جتنی دیر اللہ چاہے گا مجھے سجدہ میں رکھے پھر فرمائے گا؛محمد ! سراٹھاؤ کہو تمہاری بات سنی جائے گی، مانگو تمہیں عطا کیا جائے گا شفاعت کرو تمہاری شفاعت قبول کی جائے گی پھر میرے لیے حدبندی کی جائے گی اور میں ان لوگوں کو جنت میں داخل کردوں گا۔
پھر میں چوتھی مرتبہ آؤں گا میں کہوں گا اے میرے رب ! صرف وہ رہ گیا ہے (جسے جس کو ) قرآن نے روک رکھا ہے پھر ہر اس شخص کو جہنم سے نکال لیا جائے گا جس نے لا الہٰ الا اللہ کہا اور اس کے دل میں جو برابر بھی خیر ہوئی، پھر ان لوگوں کو جہنم سے نکال لیا جائے گا جنہوں نے لا الٰہ الا اللہ کہا اور ان کے دلوں میں گندم برابر بھی خیر ہوئی پھر ہر شخص کو جہنم سے نکال لیا جائے گا جس نے لا الٰہ الا اللہ کہا اور اس کے دل میں ذرہ برابر بھی خیر ہوئی۔ (مسند احمد، بخاری، ترمذی، ابن ماجہ عن انس)