4019: کنانہ عدوی سے مروی ہے حضرت عمر (رض) نے اجنادہ کے گورنروں کو لکھا : کہ حاملین قرآن (اہل علم) کو میرے پاس بھیجو تاکہ میں ان کو مزید رتبہ اور عطیہ دوں اور ان کو چار دانگ عالم میں بھیجوں تاکہ وہ لوگوں کو قرآن سکھائیں۔
چنانچہ حضرت ابو موسیٰ اشعری (رض) نے آپ کو لکھا کہ میرے حاملین قرآن (قرآن کو جاننے اور یاد رکھنے والے) تین سو سے کچھ اوپر ہوگئے ہیں۔
حضرت عمر (رض) نے ان کو یہ خط لکھا :
حضرت عمر (رض) کا خط
بسم اللہ الرحمن الرحیم
از بندہ خدا عمر بطرف عبداللہ بن قیس (ابو موسیٰ اشعری (رض)) اور ان کے ہمراہی حاملین قرآن
السلام علیکم :
اما بعد ! یہ قرآن تمہارے لیے باعث اجر ہے اور تمہارے مرتبہ کو بلند کرنے والا ہے اور عنداللہ ذخیرہ اجر ہے۔ تم اس کی اتباع کرو (کہ اس کے احکامات پر عمل کرو) اور یہ تمہاری اتباع نہ کرے (کہ اپنی مرضی کے مطابق اس کو ڈھال لو) بیشک قرآن نے جس کی اتباع کی قرآن اس کو کدی میں مارے گا اور جہنم میں پھینک دے گا۔ اور جس نے قرآن کی اتباع کی قرآن اس کو فردوس کے باغات میں لے جائے گا۔ پس یہ قرآن تمہارا سفارش بننا چاہیے اگر ہوسکے۔ تمہارا مخالف نہ ہونا چاہیے۔ بیشک قرآن کی جس نے سفارش کردی وہ جنت میں داخل ہوجائے گا۔ اور کتاب ہے۔ اللہ پاک اس کی بدولت اندھی آنکھوں کو کھول دیتا ہے۔ بہرے کانوں اور تالے پڑے ہوئے دلوں کو وا کردیتا ہے۔ جان رکھو ! جب بندہ رات کو اٹھتا ہے، مسواک کرتا ہے اور وضوء کرتا ہے پھر اللہ اکبر کہہ کر قرآن پڑھنا شروع کردیتا ہے تو فرشتہ اس کے منہ پر منہ رکھ کر کہتا ہے : تلاوت کر ، تلاوت کر، تو نے بہت اچھا پڑھا اور تیرے لیے بہت اچھا ہوا اور اگر صرف وضوء کرتا ہے اور مسواک نہیں کرتا تو فرشتہ صرف اس کی حفاظت کرتا ہے اور اس سے تجاوز (کرکے اس کے منہ سے منہ) نہیں کرتا۔ یاد رکھو ! نماز کے ساتھ قرآن کی تلاوت (یعنی نماز میں قرآن پڑھنا) چھپا ہوا خزانہ ہے اور بہترین موضوع ہے جس قدر ہوسکے خوب قرآن پڑھو۔
بےشک نماز نور ہے زکوۃ برہان (راہ نما) ہے ، صبر روشن ہے، روزہ ڈھال ہے، اور قرآن تمہارے حق میں حجت ہے یا تمہارے خلاف حجت ہے۔ پس قرآن کا اکرام کرو اور اس کی اہانت مت کرو۔ بیشک جس نے قرآن کا اکرام کیا اللہ اس کا اکرام کرے گا اور جس نے اس کی اہانت کی اللہ کو ذلیل کردے گا۔ جان لو ! جس نے قرآن کی تلاوت کی، اس کو یاد کیا اس پر عمل کیا ، اور جو کچھ اس میں ہے اس کی اتباع کی تو اللہ کے ہاں اس کی دعا قبول ہے چاہے تو وہ دنیا میں اس کو جلد حاصل کرلے ورنہ وہ اس کے لیے آخرت میں ذخیرہ ہوجائے گی اور جان لو ! جو اللہ کے پاس ہے وہ بہتر ہے اور ہمیشہ باقی رہنے والا ہے ان لوگوں کے لیے جو ایمان لائے اور اپنے رب پر بھروسہ کرتے ہیں۔ ابن زنجویہ۔