4027: حضرت علی (رض) سے مروی ہے کہ حضور (صلی اللہ علیہ وآلہ وسلم) نے ایک مرتبہ خطبہ دیتے ہوئے فرمایا : زندگی میں کوئی بھلائی نہیں سوائے سننے اور سن کر یاد کرنے والے کے اور بولنے والے عالم کے۔ اے لوگو ! تم آرام اور سکون کے زمانے میں ہو۔ اور زمانہ تیز رفتاری کے ساتھ جا رہا ہے۔ اور تم دیکھو رہے ہو کہ دن و رات مل کر ہر نئی شے کو پرانا و بوسیدہ کر رہے ہیں ہر دور کو قریب کر رہے ہیں۔ ہر وعدہ کو قریب لا رہے ہیں۔ پس وسیع میدان کو عبور کرنے کے لیے تیار کرلو۔
حضرت مقداد (رض) نے عرض کیا : یا نبی اللہ ! الھدنہ کیا ہے ؟ مصیبت و آزمائش اور انقطاع۔ پس جب تم پر معاملات مشتبہ ہوجائیں تاریک رات کے حصوں کی طرح تو قرآن کو لازم پکڑ لینا یہ ایسا سفارشی ہے جس کی سفارش قبول ہوئی۔ ایسا جھگڑا کرنے والا ہے جس کی بات مانی جائے جس نے اس کو اپنا امام بنایا یہ اس کو جنت میں داخل کردے گا اور جس نے اس کو پس پشت ڈال دیا یہ اس کو جہنم میں پھینک دے گا۔ یہ خیر کے راستے کی طرف راہ دکھانے والا ہے۔ یہ فیصلہ کن کلام ہے کوئی مذاق نہیں۔ اس کا ظاہر بھی ہے اور باطن بھی، ظاہر حکم ہے اور باطن گہرا علم ہے۔ یہ ایسا سمندر ہے، جس کے عجائبات کبھی ختم نہیں ہوئے، علماء اس سے بھی سیر نہیں ہوتے ۔ یہ اللہ کی مضبوط رسی ہے۔ یہ سیدھا راستہ ہے یہ ایسا حق ہے کہ جن بھی اس کے قائل ہوئے بنا نہ رہ سکے۔ جب انھوں نے اس کو سنا تو (بےساختہ) پکار اٹھے :
انا سمعنا قرا آن عجبا یھدی الی الرشد فامنا بہ۔ ہم نے عجیب قرآن سنا جو سیدھے راستے کی طرف ہدایت کرتا ہے پس ہم اس پر ایمان لے آئے، جس نے قرآن کے ساتھ بات کی اس نے سچ کہا۔ جس نے اس پر عمل کیا اجر پایا۔ جس نے قرآن کے ساتھ فیصلہ کیا اس نے عدل کیا جس نے اس پر عمل کیا اسے سیدھے رستے کی ہدایت ملی۔ اس میں ہدایت کے چراغ ہیں، حکمت کے منارے ہیں اور یہ حجت کی راہ دکھانے والا ہے۔ العسکری۔