٤٠٤٦١۔۔۔ بنی اسرائیل میں تین آدمی سفید کوڑھ والا گنجا اور اندھا تھے جن کا اللہ تعالیٰ نے امتحان لینا چاہا تو ان کی طرف ایک فرشتہ (بصورت انسان) بھیجا، وہ فرشتہ (سب سے پہلے) کوڑھی کے پاس آکر کہنے لگا : تمہیں سب سے زیادہ کیا اچھا لگتا ہے ؟ اس نے کہا : اچھا رنگ اور اچھی جلد کیونکہ لوگ مجھے گھٹیا سمجھتے ہیں تو فرشتہ نے اس پر ہاتھ پھیرا اور اسے اچھا رنگ اور اچھی جلد عطا کردی، پھر اس کہا تمہیں کون سامال سب سے زیادہ پسند ہے ؟ اس نے کہا : اونٹ تو اسے حاملہ اونٹنی دے دی گئی پھر فرشتہ نے کہا اللہ تعالیٰ تمہیں (تمہارے مال میں) برکت دے۔ اس کے بعد گنجے کے پاس آیا، اس سے کہا : تمہیں سب سے زیادہ کیا پسند ہے ؟ اس کہا، اچھے بال تال کہ یہ گنجاپن مجھ سے دور ہوجائے۔ کیونکہ لوگ مجھ سے گھن کھاتے ہیں۔ فرشتہ نے اس (کے سر) پر ہاتھ پھیرا اور (اس کا گنجاپن) چلا گیا اور اسے اچھے بال عطا ہوگئے کہا تمہیں کون سامال زیادہ محبوب ہے ؟ اس نے کہا : گائے تو اسے ایک حاملہ گائے دی اور کہا اللہ تعالیٰ تمہیں اس میں برکت عطاکرے۔ اس کے بعد وہ اندھے کے پاس آیا اور کہا : تمہیں کیا چیز سب سے بھلی لگتی ہے ؟ اس نے کہا : کہ اللہ تعالیٰ مجھے میری نظرعطا کردے تاکہ میں لوگوں کو اس سے دیکھ سکوں فرشتہ نے اس کی آنکھوں پر ہاتھ پھیراتو اللہ تعالیٰ نے اس کی نظر واپس کردی کہا : کون سامال زیادہ اچھا لگتا ہے ؟ اس نے کہا : بکریاں توا سے ایک ماں بننے والی بکری دے دی پھر کچھ عرصہ بعد ان دونوں کوڑھی اور گنجے کے جانوروں نے بچوں کو جنم دیا، اور اس کی بکری بھی بچہ والی ہوگئی۔ کوڑھی کو اونٹوں سے بھری وادی ہوگئی اور گنجے کی گائیوں سے اور نا بینے کی بکریوں کی وادی ہوگئی۔ پھر وہ فرشتہ اسی شکل و صورت میں کوڑھی کے پاس آیا، اور کہا : میں غریب مسکین آدمی ہوں سفر میں میرے اسباب سفرختم ہوگئے آج میں اللہ تعالیٰ اور تمہارے سہارے پر ہوں، میں اس ذات کے واسطہ سے تم سے سوال کرتا ہوں جس نے تمہیں اچھا رنگ، اچھی جلد اور (اونٹوں کی صورت میں) مال عطا کیا، مجھے ایک اونٹ اپنے سفر میں کام میں لانے کے لیے دے دو ! اس نے کہا : مجھ پر کئی حقوق ہیں، فرشتہ نے اس سے کہا، لگتا ہے میں تمہیں جانتا ہوں، کیا تم وہ کوڑھی نہ تھے جسے لوگ فقیر سمجھ کر نفرت کرتے تھے پھر اللہ تعالیٰ نے تمہیں مال دیا ؟ اس نے کہا : نہیں مجھے بڑے کے بعد بڑے سے یہ مال وراثت میں ملا ہے تو اس نے کہا : اگر تم جھوٹے ہو تو اللہ تعالیٰ تمہیں پھرویساہی کردے جیسا تم تھے ! پھر وہ اسی شکل و صورت میں گنجے کے پاس آیا اور اس سے بھی وہی کہا جو کوڑھی سے کہا تھا، اس نے بھی وہی جواب دیاجو اس نے دیا تھا، کہا : اگر تو جھوٹا ہے تو اللہ تعالیٰ تمہیں پھرویسا کردے جیسا تم تھے اس کے بعد وہ اندھے کے پاس اسی صورت میں آیا اور اس سے کہا : مسکین آدمی ہوں، مسافرہوں، سفر میں میرے اسباب سفر ختم ہوگئے آج میرا اللہ تعالیٰ کے سوا اور تمہارے علاوہ کوئی آسرا نہیں میں تم سے اس ذات کے وسیلہ سے سوال کرتا ہوں جس نے تمہیں بصارت عطا کی مجھے ایک بکری دوجس کے ذریعہ میں اپنے سفرکاخرچ چلاسکوں۔ اس نے کہا میں نابینا تھا اللہ تعالیٰ نے مجھے نظردی اور میں فقیر تھا اللہ تعالیٰ نے مجھے مالدار کیا جتنی بکریاں چاہولے لو، اللہ کی قسم ! میں کسی اسی چیز میں تم پر مشقت نہیں ڈالوں گا جو تم اللہ تعالیٰ کے لیے لو گے فرشتہ نے کہا : اپنے مال کو محفوظ رکھو تمہارا تو صرف امتحان مقصود تھا اللہ تعالیٰ تم سے راضی ہوا اور تمہارے دونوں ساتھیوں سے ناراض ہوا۔ بیہقی عن ابوہریرہ