4090: عقبہ بن عامر (رض) فرماتے ہیں ان گھاٹیوں میں سے ایک گھاٹی میں رسول اللہ (صلی اللہ علیہ وآلہ وسلم) کی سواری کی مہار تھامے چل رہا تھا کہ مجھے آپ (صلی اللہ علیہ وآلہ وسلم) نے فرمایا : تم بھی سوار ہوجاؤ اے عقبہ۔ مجھے خوف ہوا کہ آپ (صلی اللہ علیہ وآلہ وسلم) کی سواری پر کیسے سوار ہوں۔ لیکن پھر ڈر گیا کہیں نافرمان نہ ہوجاؤں۔ چنانچہ میں سوار ہوا اور تھوڑی دیر بعد اتر گیا۔ پھر رسول اللہ (صلی اللہ علیہ وآلہ وسلم) سوار ہوگئے۔ میں دوبارہ آپ کی سواری کی مہار تھامے چلنے لگا۔ پھر مجھے رسول اللہ (صلی اللہ علیہ وآلہ وسلم) مخاطب ہو کر فرمانے لگے : اے عقبہ ! میں سب سے بہترین دو سورتیں تم کو بتاؤں ؟ میں نے عرض کیا : میرے ماں باپ آپ پر قربان ہوں۔ یا رسول اللہ ! ضرور بتائیے ! تو آپ نے فرمایا : قل اعوذبرب الفلق اور قل اعوذ برب الناس، عقبہ فرماتے ہیں پھر جب صبح کی نماز کھڑی ہوئی تو آپ (صلی اللہ علیہ وآلہ وسلم) نے نماز میں یہ دو سورتیں تلاوت فرمائیں ۔ پھر آپ کا گذر میرے پاس سے ہوا تو فرمایا : اے عقبہ ! کیا دیکھا (ان سورتوں کی اہمیت کو) ؟ پس جب بھی سوو یا اٹھو تو ان کو ضرور پڑھو۔ رواہ ابن عساکر۔