4170: سلیمان بن یسار (رح) سے مروی ہے کہ بنی تمیم کا ایک شخص جس کو صبیغ بن عسل کہا جاتا تھا مدینہ آیا۔ اس کے پا چند کتابیں تھیں وہ لوگوں سے قرآن کے متشابہات (جن کے صحیح معنی اللہ ہی کو معلوم ہیں مثلا سورتوں کے پہلے کلمات ص، کفہیعص اور ان کے علاوہ جن کے لفظی معنی تو معلوم ہیں لیکن ان کی حقیقت اللہ ہی کو معلوم ہے۔ ) کے بارے میں سوالات کرنے لگا۔ حضرت عمر (رض) کو اس کی خبر پہنچی تو اس کو بلوایا اور کھجور کی دو چھڑیاں اس کے لیے تیار کرلیں۔ چنانچہ جب وہ آیا تو آپ نے پوچھا تم کون ہو ؟ اس نے کہا : میں اللہ کا بندہ صبیغ ہوں۔ آپ (رض) نے فرمایا : اور میں اللہ کا بندہ عمر ہوں۔ پھر آپ نے اشارہ کیا اور ان دو چھڑیوں کے ساتھ اس کو مارنا شروع کردیا حتی کہ اس کو زخمی کردیا اور خون اس کے چہرے پر بہنے لگا۔ آخر اس نے عرض کیا : یا امیر المومنین ! بس کافی ہے اللہ کی قسم ! جو میرے سر میں (خناس) تھا وہ نکل گیا ہے۔ (مسند الدارمی، نصر و الاصبہانی معا فی الحجۃ ابن الانباری، اللالکانی، ابن عساکر)