٤١٩٨٢۔۔۔ عطاء بن سائب اپنے والد سے وہ حضرت علی (رض) سے روایت کرتے ہیں کہ رسول اللہ (صلی اللہ علیہ وآلہ وسلم) نے جب فاطمہ (رض) کی شادی ان سے کی تو ایک چادر، چمڑے کا ایک تکیہ جس کا بھراؤ کھجور کی چھال تھا دوچکیاں ایک مشکیزہ اور دوگھڑے ان کے ساتھ بھیجے تو حضرت علی (رض) نے ایک دن حضرت فاطمہ (رض) سے فرمایا : اللہ کی قسم ! پانی لاتے لاتے میں پریشان دل ہوگیا ہوں اللہ تعالیٰ نے تمہارے والد کے پاس قیدی بھیجے ہیں جاؤان سے ایک خادم مانگو تو انھوں نے کہا : اللہ کی قسم ! چکی پیستے میرے ہاتھ بھی آبلہ زدہ ہوگئے ہیں۔ چنانچہ وہ رسول اللہ (صلی اللہ علیہ وآلہ وسلم) کے پاس آئیں تو آپ نے فرمایا : بیٹی کیا بات ہے ؟ تو انھوں نے کہا : میں آپ کو سلام کرنے آئی تھیں اور شرم کی وجہ سے غلام نہ مانگا اور واپس آگئیں تو حضرت علی (رض) نے کہا : کیا ہوا ؟ انھوں نے کہا : میں نے شرم کی وجہ سے سوال نہیں کیا پھر وہ دونوں آئے حضرت علی (رض) نے عرض کی : یارسول اللہ (صلی اللہ علیہ وآلہ وسلم) ! پانی ڈھوتے ڈھوتے میں دل برداشتہ ہوگیاہوں اور حضرت فاطمہ (رض) کہنے لگیں : چکی پیستے پیستے میرے ہاتھ آبلہ زدہ ہوگئے ہیں آپ کے پاس اللہ تعالیٰ نے قیدی اور کشادگی پیدا فرمادی ہے ہمیں کوئی خادم دے دیں۔ آپ نے فرمایا : اللہ کی قسم ! میں اہل صفہ کو چھوڑ کر تمہیں نہیں دے سکتا جن کے پیٹ بھوک سے دہرے ہورہے ہیں میرے پاس ان پر خرچ کے لیے کچھ نہیں لیکن میں انھیں بیچ کر ان پر ان کی قیمت خرچ کروں گا تو یہ دونوں واپس آگئے بعد میں نبی (صلی اللہ علیہ وآلہ وسلم) ان کے پاس آئے اس وقت یہ لوگ اپنی چادر میں لیٹ چکے تھے سرپر کرتے توپاؤں کھلے رہ جاتے اور پاؤں ڈھاپنتے تو سرننگا رہ جاتا تو وہ اٹھنے لگے تو آپ نے فرمایا : وہیں ر ہو پھر فرمایا : کیا میں تمہیں وہ چیز نہ بتاؤں جو تمہارے سوال سے بہتر ہے ؟ ان دونوں نے عرض کی : کیوں نہیں آپ نے فرمایا : مجھے جبرائیل (علیہ السلام) نے کچھ کلمات سکھائے ہیں ہر نماز کے بعد دس بار سبحان اللہ دس بار الحمد للہ اور دس بار اللہ اکبرکہا کرو اور جب رات سونے کے لیے اپنے بستروں پر آؤ توتینتیس بار سبحان اللہ تینتیس بار الحمد للہ اور چونتیس بار اللہ اکبر کہا کرو۔ حضرت علی (رض) نے فرمایا : کہ جب سے مجھے رسول اللہ (صلی اللہ علیہ وآلہ وسلم) نے یہ کلمات سکھائے ہیں میں نے انھیں نہیں چھوڑاتوابن الکوانے ان سے کہا : نہ صفین کی رات ! آپ نے فرمایا : عراق والو ! اللہ تعالیٰ تمہیں ہلاک کرے ہاں نہ صفین کی رات۔ الحمیدی، ابن ابی شیبۃ، مسند احمد عبدالرزاق، والعدنی والشاشی والعسکری فی المواعظ وابن جریر، حاکم، ضیاء وروی النسائی وابن ماجۃ بعضہ