42509: ۔۔۔ لوگو ! یہ امت اپنی قبروں میں آزمائش میں ڈالی جائے گی، انسان کو جب دفن کیا جاتا ہے اور اس کے رشتہ دار (دفنانے کے بعد) پلٹ آتے ہیں تو اس کے پاس ایک فرشتہ آتا ہے جس کے ہاتھ میں ایک گرز ہوتا ہے، وہ اسے بٹھاتا ہے اور کہتا ہے : اس شخص کے بارے میں تو کیا کہتا ہے ؟ پس اگر وہ مومن ہوا تو کہے گا : میں گواہی دیتا ہوں کہ اللہ تعالیٰ کے سوا کوئی پکارو عبادت کے لائق نہیں، اور محمد (صلی اللہ علیہ وآلہ وسلم) اللہ تعالیٰ کے بندے اور رسول ہیں، فرشتہ اس سے کہتا ہے : تو نے سچ کہا، پھر جہنم کی طرف سے اس کی جانب ایک دروازہ کھول دیا جاتا ہے، پھر فرشتہ کہتا ہے۔ یہ تیرا ٹھکانا ہوتا اگر تو نے اپنے رب کا انکار کیا ہوگا، مگر تم (اپنے رب پر) ایمان لے آئے اس لیے تمہارا ٹھکانا یہ ہے پھر جنت کی جانب سے اس کے لیے ایک دروازہ کھول دیا جاتا ہے تو وہ اس کی طرف اٹھنے کی کوشش کرتا ہے تو فرشتہ اس سے کہتا ہے : تو یہیں ٹھہر ! پھر اس کی قبر میں وسعت کردی جاتی ہے۔
پس اگر وہ کافر ہوا یا منافق تو فرشتہ اس سے کہے گا تو اس شخص کے بارے میں کیا کہتا ہے وہ کہے گا : مجھے کچھ پتہ نہیں، میں نے لوگوں کو ایک بات کہے سنا، فرشتہ اس سے کہے گا : نہ تو نے خود جانا، نہ کسی کی پیروی کی اور نہ تو نے ہدایت پائی، پھر اس کے لیے جنت کی جانب ایک دروازہ کھول کر کہا جائے گا : یہ تیرا ٹھکانا ہوتا اگر تو اپنے رب پر ایمان لایا ہوگا مگر جب تم نے انکار کیا تو اللہ تعالیٰ نے اس کے بدلہ میں تمہیں یہ جگہ دی اور جہنم کی طرف سے اس کے لیے ایک دروازہ کھول دیا جاتا ہے پھر اسے گرز سے مارتا ہے جس کی آواز جن و انس کے علاوہ ساری مخلوق سنتی ہے، تو کچھ لوگوں نے عرض کیا : یا رسول اللہ ! جس کے پاس بھی فرشتہ گرز لے کر کھڑا ہوگا تو وہ اس وقت خوفزدہ ہوجائے گا، تو آپ نے فرمایا : اللہ تعالیٰ ایمان والوں کو سچی بات کی وجہ سے ثابت قدم رکھے گا۔۔
مسند احمد، ابن ابی الدنیا فی ذکر الموت وابن ابی عاصم فی السنۃ وابن جریر، مسلم فی عذاب القبر عن ابی سعید وصحح