4328: عبیدۃ سلمانی سے مروی ہے کہ ایک مرد اور اس کی بیوی (امیر المومنین) حضرت علی (رض) کی خدمت میں حاضر ہوئے۔ ہر ایک کے ساتھ (ان کی اپنی اپنی برادری) کے کچھ لوگ تھے۔ حضرت علی (رض) نے ان کو سامنے آنے کا حکم سنایا۔ دونوں گروہوں نے اپنے میں سے ایک ایک ثالث آگے کردیا۔ آپ (رض) نے دونوں کو فرمایا : تم جانتے ہو تم پر کیا چیز لازم ہے ؟ تم پر یہ لازم ہے کہ اگر تم سمجھو کہ وہ دونوں اکٹھے ہوسکتے ہیں تو ان کو اکٹھا کردو۔ اور اگر تم سمجھتے ہو کہ ان کے حق میں جدائی بہتر ہے تو جدائی کرا دو ۔ چنانچہ عورت نے کہا : میں اللہ کی کتاب پر راضی ہوں جو بھی فیصلہ کرے خواہ میرے خلاف ہو یا میرے حق میں میں اس کے حق میں ہوں۔ جبکہ مرد بولا : جدائی تو مجھے منظور نہیں۔ حضرت علی (رض) نے فرمایا : تو غلط بولتا ہے۔ اللہ کی قسم تجھے بھی اس عورت کی طرح اقرار کرنا ہوگا (کہ مجھے ہر صورت میں اللہ کا حکم منظور ہے) ۔ (الشافعی، عبدا لرزاق، السنن لسعید بن منصور، عبد بن حمید، ابن جریر، ابن المنذر، ابن ابی حاتم، شعب الایمان للبیہقی)
فائدہ :۔۔ فرمان الہی ہے :
فلا وربک حتی یحکموک فی ما شجر بینہم ثم لا یجدوا فی انفسہم حرجا مما قضیت و یسلموا تسلیما۔ سورة النساء۔
قسم ہے تیرے رب کی ! یہ لوگ جب تک اپنے تنازعات میں تمہیں منصف نہ بنائیں اور جو فیصلہ تم کردو اس سے اپنے دل تنگ نہ کریں بلکہ اس کو خوشی سے مان لیں تب تک مومن نہ ہوں گے۔
اسی آیت بالا کی تشریح میں حضرت علی (رض) نے مرد کو یہ حکم فرمایا۔ اور جو حکم حضرت علی (رض) نے فرمایا اسی کا خدا نے حکم فرمایا ہے کہ میاں بیوی میں تنازعہ بڑھ جائے تو دونوں اپنی اپنی طرف سے ایک ایک ثالث مقرر کردیں اور وہ جو بہتر سمجھیں فیصلہ کردیں۔