4343: سدی عن ابی صالح عن ابن عباس (رض) کی سند سے مروی ہے کہ رسول اکرم (صلی اللہ علیہ وآلہ وسلم) نے خالد بن ولید بن مغیرہ مخزومی کو ایک لشکر دے کر بھیجا۔ سریہ (لشکر) میں حضرت عمار (رض) بن یاسر بھی تھے۔ یہ لشکر نکلا اور جس قوم کے پاس پہنچنے کا ارادہ تھا صبح کے قریب وہ ان کے پاس پہنچے۔ لہٰذا یہ لشکر پہلے ہی ایک جگہ ٹھہر گیا۔ اس قوم کو کسی نے ڈرایا اور وہ راتوں رات جہاں ممکن ہوا بھاگ گئے۔ لیکن ان میں سے ایک شخص وہیں رک گیا اور وہ اور اس کے اہل خانہ اسلام لا چکے تھے۔ وہ ان کو سوار کرکے لشکر کے پاس لایا اور بولا تم یہیں ٹھہروں میں آتا ہوں۔ پھر وہ حضرت عمار بن یاسر (رض) کے پاس آئے اور بولے اے ابو الیقظان ! میں اور میرے گھر والے اسلام لا چکے ہیں۔ اگر میں یہیں ٹھہرا رہا تو مجھے کچ فائدہ ہے، آپ مجھے امان دے سکتے ہیں ؟ جب کہ میری قوم آپ کا سنتے ہی بھاگ چکی ہے۔
حضرت عمار (رض) نے اس شخص کو فرمایا تم یہیں ٹھہرسکتے میں تم کو امان دیتا ہوں۔ چنانچہ وہ اپنے اہل خانہ کے ساتھ چلا گیا۔ صبح کو حضرت خالد نے قوم پر لشکر کشی کی تو وہاں اس کے علاوہ کوئی نہ ملا۔ حضرت عمار (رض) نے حضرت خالد (رض) کو فرمایا اس شخص پر تمہارا کوئی اختیار نہیں، یہ اسلام لا چکا ہے۔ حضرت خالد (رض) نے فرمایا : کیا تم اس کو امان دیتے جبکہ امیر میں ہوں۔ حضرت عمار (رض) نے فرمایا : ہاں میں اس کو امان دیتا ہوں اگرچہ تم امیر ہو۔ آدمی ایمان لا چکا ہے۔ اگر یہ چاہتا تو جاسکتا تھا جیسے اس کے ساتھی چلے گئے۔ لیکن میں نے اس کو ٹھہرنے کا کہا ہے دونوں صحابیوں کا اس کے بارے میں تنازعہ کھڑا ہوگیا حتی کہ ایک دوسرے کو کچھ کچھ کہنے لگے۔
جب دونوں حضرات مدینہ آئے تو رسول اکرم (صلی اللہ علیہ وآلہ وسلم) کے پاس اکٹھے ہوئے۔ حضرت عمار (رض) نے اس شخص کا تذکرہ کیا تو رسول اللہ (صلی اللہ علیہ وآلہ وسلم) نے حضرت عمار (رض) کی امان کو جائز قرار دیا۔ لیکن ساتھ ہی عام ممانعت بھی فرما دی کہ کوئی شخص امیر کے ہوتے ہوئے امان نہ دے۔ یہاں بھی دونوں حضرات حضور (صلی اللہ علیہ وآلہ وسلم) کے سامنے ایک دوسرے کو برا بھلا کہنے لگے۔
حضرت خالد (رض) نے عرض کیا : یا رسول اللہ ! دیکھیے یہ غلام آپ کے پاس مجھے برا بھلا کہہ رہا ہے اگر آپ نہ ہوتے تو یہ مجھے یوں نہ کہہ سکتا۔ آپ (صلی اللہ علیہ وآلہ وسلم) نے فرمایا : خالد ! بس کرو عمار کو چھوڑو، جو عمار سے بغض رکھے گا اللہ عزوجل اس سے بغض رکھے گا۔ جو عمار کو لعنت کرے گا اللہ اس پر لعنت کرے گا۔ پھر عمار (رض) کھڑے ہو کر چل دیے ۔ چنانچہ خالد (رض) کو بھی تنبیہ ہوئی اور وہ ان کے پیچھے پیچھے گئے اور عمار (رض) کے کپڑے پکڑ کر ان کو راضی کرنے لگے حتی کہ آپ (رض) خالد (رض) سے رضا مند ہوگئے۔ تب یہ آیت نازل ہوئی۔
یا یہا الذین امنوا اطیعو اللہ و اطیعو الرسول واولی الامر منکم فان تنازعتم فی شیء فردوہ الی اللہ والرسول ذالک خیر واحسن تاویلا۔ النساء : 59 ۔
اے مومنو ! خدا اور اس کے رسول کی فرمان برداری کرو اور جو تم میں سے صاحب حکومت ہیں ان کی بھی۔ اور اگر کسی بات میں تم میں اختلاف واقع ہوجائے تو اگر تم خدا اور روز آخرت پر ایمان رکھتے ہو تو اس میں خدا اور اس کے رسول (کے حکم) کی طرف رجوع کرو۔ یہ بہت اچھی بات ہے اور اس کا انجام بھی اچھا ہے۔ رواہ ابن جریر۔