4392: ۔۔ (مسند عمر (رض)) حضرت عمر (رض) فرماتے ہیں : جب عبداللہ بن ابی کی وفات ہوئی رسول اکرم (صلی اللہ علیہ وآلہ وسلم) کو اس پر نماز جنازہ پڑھنے کے لیے بلایا گیا۔ چنانچہ آپ چلے گئے اور اس کے جنازے کے سامنے کھڑے ہوگئے۔ آپ نماز پڑھنے کا ارادہ کر ہی رہے تھے کہ میں نے اپنی جگہ سے ہٹ کر آپ کے سامنے جا کھڑا ہوا میں نے عرض کیا : یا رسول اللہ ! آپ اللہ کے دشمن عبداللہ بن ابی پر نماز پڑھ رہے ہیں۔ جس نے فلاں دن یہ کہا فلاں یہ کہا اور میں اس کے خبیث ایام گنوانے لگا جبکہ رسول اللہ (صلی اللہ علیہ وآلہ وسلم) مسکراتے رہے۔ حتی کہ میں نے (اس کی) بہت سی باتیں گنوا دیں۔ پھر آپ (صلی اللہ علیہ وآلہ وسلم) نے مجھے فرمایا : اے عمر مجھ سے ہٹ جاؤ، مجھے اختیار دیا گیا ہے۔ مجھے کہا گیا ہے :
استغفرلھم اولا تستغفر لھم ان تستغفرلھم سبعین مرۃ فلن یغفر اللہ لھم۔ التوبہ : 80 ۔
آپ ان کے لیے استغفار کریں یا نہ کریں، اگر آپ ان کے لیے ستر بار استغفار کریں گے تب بھی ہرگز اللہ ان کو معاف نہیں کرے گا۔
پھر آپ نے فرمایا : اگر مجھے علم ہوتا کہ اگر میں ستر سے زائد مرتبہ استغفار کروں تو اس کی مغفرت ہوجائے گی تو میں ضرور کرتا۔ پھر آپ (صلی اللہ علیہ وآلہ وسلم) نے اس کی نماز جنازہ پڑھائی جنازے کے ساتھ چلے پھر اس کی قبر پر بھی کھڑے رہے حتی کہ اس کی تدفین سے فراغت ہوگئی۔
حضرت عمر (رض) فرماتے ہیں مجھے حضور پر جرات کرنے پر بہت تعجب و افسوس ہوا کہ اللہ اور اس کا رسول زیادہ جانتے ہیں۔ (مجھے ایسا نہیں کرنا تھا) پھر کچھ ہی عرصہ گذرا تھا کہ یہ دو آیات نازل ہوئیں۔
منافق کی جنازہ پڑھنے سے ممانعت
و لا تصل علی احد منہم مات ابدا ولا تقم علی قبرہ۔
اور آپ ان میں سے کسی پر جو مرجائے کبھی نماز نہ پڑھیں اور نہ اس کی قبر پر کھڑے ہوں۔ پس اس کے بعد کبھی رسول اللہ (صلی اللہ علیہ وآلہ وسلم) نے کسی منافق کی نماز نہیں پڑھی اور نہ کبھی کسی منافق کی قبر پر کھڑے ہوئے حتی کہ اللہ عزوجل نے آپ کی روح قبض کرلی۔ (مسند احمد، بخاری، ترمذی، مسلم، ابن جریر، ابن ابی حاتم، ابن حبان، ابن مردویہ، حلیۃ الاولیاء ، السنن للبیہقی)