4459: ۔ حضرت علی (رض) سے مروی ہے ارشاد فرمایا :
جس شخص نے حضرت ابراہیم (علیہ السلام) ان کے پروردگار کے بارے میں مناظرہ کیا اس نے دو کرگس (گدھ) کے بچے لیے اور ان کی پرورش کی حتی کہ وہ موٹے تازہ اور جوان ہوگئے۔ چنانچہ پھر اس نے ہر ایک کی ایک ایک ٹانگ کے ساتھ رسی باندھ کر تابوت کو رسی باندھ دی اور دونوں کو بھوکا رکھا۔ پھر تابوت میں اپنے ساتھ ایک آدمی کو لے کر بیٹھ گیا پھر ایک لاٹھی پر گوشت بندھوا کر تابوت کے اوپر لگوا دی۔ چنانچہ دونوں کرگس اڑے۔ اندر بیٹھے ہوئے ایک شخص نے دوسرے کو کہا : کیا تم دیکھ رہے ہو ؟ اس نے کہا : یہ دیکھ رہا ہوں حتی کہ ایک بلندی پر پہنچ کر کہا : میں دنیا کو مکھی کے مثل دیکھ رہا ہوں۔ پھر اس نے اپنے ساتھی کو حکم دیا کہ لکڑی سیدھی کردو (یعنی اس کا رخ نیچے کی طرف کردو) چنانچہ پھر دونوں نیچے اتر آئے اور یہی فرمان باری کا مطلب ہے :
وان کان مکرہم لتزول منہ الجبال۔ ابراہیم : 46 ۔
اور اگرچہ ان کی تدبیریں (ایسی تھیں کہ) ان سے پہاڑ بھی ٹل جائیں۔ رواہ ابن جریر۔