4485: ۔۔ (مسند ابی الدرداء (رض)) حضرت ابو الدرداء (رض) فرماتے ہیں کہ اللہ عزوجل رات کی آخری تین گھڑیوں میں ذکر کھولتے ہیں۔ پہلی گھڑی میں اس کتاب میں نظر فرماتے ہیں جس کو اس کے سوا کوئی نہیں دیکھ سکتا۔ چنانچہ جو چاہتے ہیں مٹا دیتے یں اور جو چاہتے یں لکھا رہنے دیتے ہیں۔ دوسری گھڑ میں جنت عدن کو دیکھتے ہیں یہ اللہ کا وہ گھر ہے جس کو ابھی تک کسی آنکھ نے نہیں دیکھا اور نہ کسی دل پر اس کا خیال تک گذرا (کہ وہ کیسی ہے اور اس میں کیا کیا ہے) یہ اللہ کا مسکن ہے۔ اس میں بنی آدم میں سے صرف تین قسم کے لوگ رہیں گے۔ انبیاء، صدیقین اور شہداء، پھر اللہ تعالیٰ اس جنت کو فرماتے ہیں : خوشی کا مقام ہے اس شخص کے لیے جو تجھ میں رہے گا۔ پھر اللہ تعالیٰ تیسری گھڑی میں روح الامین (جبرئیل (علیہ السلام)) اور دوسرے فرشتوں کے ساتھ آسمان دنیا پر اترتے یں۔ اور روح الامین اور دوسرے فرشتے ہر طرف پھیل جاتے ہیں۔ اللہ تعالیٰ فرماتے ہیں :
میری عزت کی قسم کھڑے ہوجاؤ، پھر بندوں کو ارشاد فرماتے ہیں : کوئی ہے مغفرت چاہنے والا میں اس کی مغفرت کروں ؟ کوئی ہے سائل میں اس کو عطا کروں ؟ کوئی ہے مانگنے والا میں اس کی پکار کو سنوں۔ حتی کہ فجر طلوع ہوجاتی ہے یہی مطلب ہے ارشاد ربانی کا :
وقرآن الفجر ان قرآن الفجر کان مشہودا۔ الاسراء : 78 ۔
اور صبح کو قرآن پڑھا کرو کیونکہ صبح کے وقت قرآن پڑھنا (جہاں ہوتا ہے وہاں) ملائکہ حاضر ہوتے ہیں۔
یعنی اس وقت رات اور دن کے ملائکہ اکٹھے ہو کر اس کا قرآن سنتے ہیں۔ اور اللہ پاک بھی اس کا قرآن سنتے ہیں۔ (ابن جریر، ابی الدرداء)