4505: ۔۔ نعمان بن سعد (رح) سے مروی ہے، فرماتے ہیں ہم حضرت علی (رض) کے پاس حاضر خدمت تھے۔ آپ (رض) نے یہ آیت تلاوت فرمائی :
یوم نحشر المتقین الی الرحمن وفدا۔ مریم : 75 ۔
جس دن ہم پرہیزگاروں کو رحمن کے سامنے (بطور) مہمان جمع کریں گے۔
پھر آپ (رض) نے ارشاد فرمایا : نہیں، اللہ کی قسم ! وہ لوگ اپنے پیروں پر چل کر نہیں آئیں گے اور نہ پیروں پر کھڑے حاضر ہوں گے اور نہ ان کو ہانک کر لایا جائے گا۔ بلکہ جنت کی اونٹنیوں میں سے اونٹنیوں پر بٹھا کر لایا جائے گا۔ مخلوقات نے ان جیسی اونٹنیاں نہیں دیکھی ہوں گی۔ ان پر سونے کے کجاوے ہوں گے اور ان کی لگامیں زبرجد کی ہوں گی وہ ان پر سوار ہو کر آئیں گے۔ (ابن ابی شیبہ، عبداللہ بن احمد بن حنبل فی الزیادات، ابن جریر، ابن المنذر، ابن ابی حاتم، ابن مردویہ، مستدرک الحاکم، البعث للبیہقی)
کلام : ۔۔ نعمان بن سعد ثقہ تابعی ہیں جو حضرت علی، حضرت اشعث بن قیس اور حضرت مغیرہ بن شعبہ (رض) سے روایت کرتے ہیں، ابن حبان (رح) نے ان کو ثقات میں شمار کیا ہے لیکن ان سے روایت کرنے والا راوی ضعیف ہے جس کی وجہ سے اس خبر سے دلیل نہیں لی جاسکتی۔ (تھذیب التھذیب 10/453 ۔ بحوالہ کنز العمال ج 2 ص 465)