45850 معمر، زہری سے روایت نقل کرتے ہیں کہ انھیں حدیث پہنچی ہے کہ نبی کریم (صلی اللہ علیہ وآلہ وسلم) کے زمانے میں عورتیں کسی جگہ اسلام لے آتی تھیں اور ہجرت نہیں کرتی تھیں جب وہ اسلام لاتی تھیں ان کے شوہر بدستور کافر ہوتے تھے۔ ایسی عورتوں میں سے ایک عاتکہ بنت ولید بن مغیرہ بھی ہے وہ صفوان بن امیہ کے نکاح میں تھی چنانچہ عاتکہ فتح مکہ کے دن اسلام لے آئی اور اس کا شوہر صفوان بن امیہ اسلام سے بھاگ گیا اور سمندر کی طرف چلا گیا۔ اس کے چچا زاد بھائی وھب بن عمیر بن وھب بن خلف نے صفوان کی طرف رسول کریم (صلی اللہ علیہ وآلہ وسلم) کی چادر لے کر قاصد بھیجا کہ واپس لوٹ آؤ رسول اللہ (صلی اللہ علیہ وآلہ وسلم) نے تمہیں امان دے دیا ہے اور رسول کریم (صلی اللہ علیہ وآلہ وسلم) نے اسے اسلام کی دعوت دی کہ اگر اسلام لانا چاہے تو اسلام لے آئے ورنہ آپ (صلی اللہ علیہ وآلہ وسلم) اسے دو ماہ کے لیے جلاوطن کردیں گے چنانچہ جب صفوان بن امیہ رسول کریم (صلی اللہ علیہ وآلہ وسلم) کے پاس آپ کی چادر لے کر واپسی لوٹا تو اس نے سرعام گھوڑے پر سوار ہوئے ہوئے اعلان کیا کہ اے محمد ! یہ وھب بن عمیر میرے پاس تمہاری چادر لایا ہے اور یہ کہتا ہے کہ تم نے مجھے مکہ واپس آنے کی دعوت دی ہے اگر میں تمہاری بات سے رضامند ہوجاؤں تو اچھا ہے ورنہ تم نے مجھے دو مہینے کی مہلت دی ہے رسول کریم (صلی اللہ علیہ وآلہ وسلم) نے فرمایا : اے ابو وھب ! نیچے اترو صفوان نے جواب دیا بخدا ! میں اس وقت تک نیچے نہیں اتروں گا جب تک تم واضح نہیں کردوں گے نبی کریم (صلی اللہ علیہ وآلہ وسلم) نے فرمایا بلکہ تمہیں چار ماہ کی مہلت ہے۔ اس کے بعد رسول کریم (صلی اللہ علیہ وآلہ وسلم) لشکر کے ساتھ ھوازن کی طرف تشریف لے گئے اور صفوان کو پیغام بھیج کر اسلحہ عاریۃ طلب کیا صفوان نے کہا : کیا مجھ سے اسلحہ بخوشی طلب کیا جارہا ہے یا زبردستی ؟ آپ (صلی اللہ علیہ وآلہ وسلم) نے فرمایا : نہیں بلکہ ہمیں اسلحہ بخوشی چاہیے۔ چنانچہ صفوان کے پاس جس قدر اسلحہ تھا بخوشی نبی کریم (صلی اللہ علیہ وآلہ وسلم) کو عاریۃ بھیجوادیا۔ جب کہ صفوان بذات خود رسول کریم (صلی اللہ علیہ وآلہ وسلم) کے ہمراہ چل دیا ابھی اس نے اسلام نہیں لایا تھا بدستور کافر ہی تھا۔ چنانچہ بحالت کفر وہ حنین وطائف میں شریک رہا جبکہ اس کی بیوی اسلام لاچکی تھی۔ رسول کریم (صلی اللہ علیہ وآلہ وسلم) نے اس کے اور اس کی بیوی کے درمیان اسی عرصہ میں تفریق نہیں کی ہے۔ بالآخر صفوان اسلام لے آیا اور سابق نکاح ہی میں اس کی بیوی اس کے پاس رہی۔ اسی طرح ام حکیم بنت حارث بن ہشام فتح مکہ کے موقع پر اسلام لے آئے جب کہ ان کے شوہر عکرمہ بن ابی جہل اسلام سے بھاگ کر یمن آچکے تھے۔ ام حکیم بنت حارث ان کے پیچھے سفر کرکے یمن آگئیں اور انھیں اسلام کی دعوت دی عکرمہ (رض) نے اسلام قبول کرلیا ام حکیم انھیں لے کر رسول کریم (صلی اللہ علیہ وآلہ وسلم) کے پاس آگئیں جب آپ (صلی اللہ علیہ وآلہ وسلم) نے عکرمہ (رض) کو دیکھا تو خوشی سے عکرمہ (رض) کی طرف کو دپڑے اور ان سے بیعت لے لی۔ ہمیں خبر نہیں پہنچی کہ رسول اللہ (صلی اللہ علیہ وآلہ وسلم) نے عکرمہ (رض) اور ان کی بیوی ام حکیم کے درمیان تفریق کی ہو ۔ بلکہ وہ دونوں سابق نکاح پر ہی قائم رہے۔ ہمیں یہ خبر بھی نہیں پہنچی کہ کسی عورت نے رسول کریم (صلی اللہ علیہ وآلہ وسلم) کی طرف ہجرت کی ہو اور اس کا شوہر کافر ہو اور وہ دارالکفار میں ہو مگر ایسا ہوا ہے کہ عورت کی ہجرت نے اس کے اور اس کے کافر شوہر کے درمیان فرقت ڈال دی ہے البتہ اگر وہ بیوی کی عدت گزرنے سے قبل ہجرت کرکے دارالھجرت پہنچ جائے ہمیں یہ خبر نہیں پہنچی کہ کسی عورت اور اس کے شوہر کے درمیان فرقت ڈالی گئی ہو جب کہ اس کا شوہر بیوی کی عدت کے دورن ہجرت کرکے بیوی کے پاس پہنچا ہو۔ رواہ عبدالرزاق