45851 ابن جریج ایک شخص سے روایت نقل کرتے ہیں کہ ابن شہاب کہتے ہیں ! نبی کریم (صلی اللہ علیہ وآلہ وسلم) کی بیٹی زینب (رض) اسلام لاچکی تھیں اور نبی کریم (صلی اللہ علیہ وآلہ وسلم) کے بعد پہلی ہجرت میں مدینہ پہنچی تھیں جب کہ ان کے شوہر ابوعاص بن ربیع بن عبدالعزی مشرک تھے اور مکہ ہی میں مقیم تھے۔ پھر ابوالعاص مشرک ہی جنگ بدر میں مشرکین کے ساتھ شریک ہوئے بدر میں مسلمانوں نے انھیں قیدی بنالیا تھا، مالدار تھے اس لیے فدیہ دے کررہا ہوگئے تھے پھر احد میں مشرک ہی شریک ہوئے احد سے مکہ واپس لوٹے پھر کچھ عرصہ ہی میں ٹھہرے رہے۔ پھر تجارت کے لیے شام کا سفر کیا اور راستے میں انصار کی ایک جماعت نے انھیں گرفتار کرلیا۔ زینب (رض) (ان کی گرفتاری کی خبر پہنچی تو وہ ) نبی کریم (صلی اللہ علیہ وآلہ وسلم) کی خدمت میں حاضر ہوئیں اور عرض کیا : مسلمان مشرکین پر زیادتی کررہے ہیں : ارشاد فرمایا : اے زینب کیا معاملہ ہے ؟ عرض کیا : میں نے ابوالعاص کو پناہ دے دی ہے۔ فرمایا : میں نے تمہاری پناہ کی اجازت دے دی پھر اس کے بعد آپ (صلی اللہ علیہ وآلہ وسلم) نے کسی عورت کی پناہ کی اجازت نہیں دی۔ چنانچہ ابوالعاص پھر اسلام لے آئے اور اپنے سابق نکاح پر ہی قائم رہے۔ اسی دوران حضرت عمر (رض) نبی کریم (صلی اللہ علیہ وآلہ وسلم) کو زینب (رض) کے لیے پیغام نکاح بھیجتے تھے اور نبی کریم (صلی اللہ علیہ وآلہ وسلم) نے زینب (رض) سے اس کا تذکرہ بھی کیا تھا۔ زینب (رض) نے جواب دیا تھا کہ یارسول اللہ ! جیسا کہ آپ کو معلوم ہے کہ ابوالعاص آپ کیا چھے داماد ہیں، اگر آپ بہتر سمجھیں تو ان کا انتظار کریں۔ رسول کریم (صلی اللہ علیہ وآلہ وسلم) اس موقع پر خاموش رہے تھے ابن شہاب کہتے ہیں : ابوسفیان بن حرب اور حکیم بن حزام مرالظہران کے مقام پر اسلام لائے تھے پھر یہ حضرات اپنی مشرکہ بیویوں کے پاس تھے پھر انھوں نے بھی اسلام قبول کرلیا تھا وہ اپنے سابق نکاح پر ہی قائم رہے تھے۔ چنانچہ مخرمہ کی بیوی شفاء بنت عوف تھیں جو کہ حضرت عبدالرحمن بن عوف (رض) کی بہن تھیں حکیم بن حزام (رض) کی بیوی زینب بنت عوام تھیں، ابوسفیان کی بیوی ھند بنت عتبہ بن ربیعہ تھیں صفوان بن امیہ کے نکاح میں دو عورتیں تھیں عاتکہ بنت ولید اور آمنہ بنت ابی سفیان چنانچہ عاتکہ کے ساتھ آمنہ بنت ابی سفیان بھی فتح مکہ کے بعد اسلام لے آئی تھیں ان کے بعد پھر صفوان (رض) نے اسلام قبول کیا تھا اور وہ دونوں بیویوں کے نکاح پر قائم رہے تھے۔