45916 شعبی کی روایت ہے کہ حضرت عمر (رض) کی خدمت میں ایک عورت حاضر ہوئی اور کہنے لگی : میں آپ سے اہل دنیا کے بہترین لوگوں کی شکایت کرتی ہوں بجز ایک شخص کے جو اپنے عمل کے اعتبار سے سبقت لے چکا ہے۔ جو رات کو عبادت کے لیے کھڑا ہوتا ہے اور صبح تک کھڑا رہتا ہے۔ پھر صبح کو روزہ رکھتا ہے اور روزے ہی میں شام کردیتا ہے۔ اتنا کہنے کے بعد عورت پر حیاء طاری ہوگئی اور پھر بولی : امیر المومنین ! میری طرف سے اسی کو کافی سمجھیں۔ حضرت عمر (رض) نے فرمایا : اللہ تعالیٰ تمہیں جزائے خیر عطا فرمائے تم نے بہت اچھی تعریف کی میں نے تمہاری بات کافی سمجھ لی جب وہ عورت اٹھ کر چل پڑی تو کعب بن سوربولے : اے امیر المومنین ! اس عورت نے بڑے بلیغانہ انداز میں آپ سے شکایت کی ہے عمر (رض) نے پوچھا : بھلا اس نے کس کی شکایت کی ہے کعب بولے : اس نے اپنے شوہر کی شکایت کی ہے فرمایا عورت کو میرے پاس لاؤ۔ جب عورت واپس آگئی تو آپ (رض) نے کعب کو حکم دیا کہ ان دونوں کے درمیان فیصلہ کرو کعب بولے : میں آپ کی موجودگی میں کیسے فیصلہ کرسکتا ہوں فرمایا : تم وہ بات سمجھ گئے ہو جو میں نہیں سمجھ سکا ہوں۔ کعب کہنے لگے : فرمان باری تعالیٰ ہے۔ فانکحوا ماطاب لکم من النساء مثنی وثلاث ورباع عورتوں میں سے جو تمہیں اچھی لگیں انھیں اپنے نکاح میں لاؤ دو دو کو تین تین کو اور چار چار کو۔ پھر کعب نے عورت کے شوہر کی طرف متوجہ ہو کر کہا تین دن روزہ رکھو اور ایک دن اپنی بیوی کے پاس افطار کرو تین راتیں قیام اللیل کرو اور ایک رات بیوی کے پاس گزارو اس عجیب فیصلے کو سن کر حضرت عمر (رض) بولے : یہ فیصلہ میرے لیے تمہاری پہلی فطانت سے کہیں زیادہ تعجب خیز ہے۔ چنانچہ حضرت عمر (رض) نے کعب بن سور کو اہل بصرہ کا قاضی مقرر کرکے بھیجا۔ رواہ ابن سعد