4600: ۔۔ حضرت عوف بن مالک (رض) سے مروی ہے کہ ایک مرتبہ یہودیوں کے عید کے روز نبی اکرم (صلی اللہ علیہ وآلہ وسلم) مجھے ساتھ لے کر ان کے کنیسہ میں تشریف لے گئے۔ یہودیوں نے (عید کے روز) ہمارا اپنے ہاں آنا ناگوار محسوس کیا۔ نبی کریم (صلی اللہ علیہ وآلہ وسلم) نے ان کو ارشاد فرمایا۔
اے یہود ! تم لوگ مجھے اپنے بارہ آدمی دکھا دو جو لا الہ الا اللہ محمد رسول اللہ کی گواہی دیتے ہوں ؟ اللہ پاک آسمان کے نیچے رہنے والے ہر یہودی سے اپنے غضب کے عذاب کو ہٹا دے گا جو غضب ان پر اللہ نے نازل کیا ہوا ہے۔ یہود چپ ہوگئے کسی نے کوئی جواب نہ دیا آپ (صلی اللہ علیہ وآلہ وسلم) نے دوبارہ اپنی بات دہرائی۔ مگر پھر کسی نے کوئی جواب نہ دیا۔ آپ (صلی اللہ علیہ وآلہ وسلم) نے سہ بارہ اپنی دبات دہرائی مگر پھر بھی سب خاموش رہے پھر آپ (صلی اللہ علیہ وآلہ وسلم) نے فرمایا : تم تو انکار کرتے ہو لیکن اللہ کی قسم ! میں ہی حاشر ہوں، میں ہی عاقب ہوں، میں مقعی نبی مصطفیٰ ہوں (جس کا تمہاری کتاب میں ذکر آیا ہے) تم ایمان لاؤ یا جھٹلاؤ۔
عوف (رض) کہتے ہیں پھر آپ (صلی اللہ علیہ وآلہ وسلم) اور میں لوٹنے لگے۔ ہم (کنیسہ سے) نکلنے کے قریب تھے کہ اچانک ہمارے پیچھے ایک آموجود ہوا اور بولا ٹھہرئیے ! اے محمد ! پھر وہ اپنے یہودیوں کی طرف متوجہ ہو کر پوچھنے لگا : اے یہودیو کی جماعت ! میں کیسا شخص ہوں ؟
یہودی کہنے لگے : اللہ کی قسم ! ہم اپنے درمیان تم سے زیادہ کوئی کتاب اللہ ( توراۃ ) کو جاننے والا نہیں دیکھتے۔ نہ تم سے زیادہ فقیہ اور آپ سے پہلے آپ کے باپ سے زیادہ کسی کو اور نہ آپ کے باپ سے پہلے آپ کے دادا سے زیادہ افضل کسی کو جانتے ! پھر اس شخص نے کہا : میں شہادت دیتا ہوں کہ یہ وہی نبی ہیں جن کو تم توراۃ میں پاتے ہو۔
پھر یہودی کہنے لگے : تو جھوٹ بولتا ہے پھر وہ اس کے بارے میں برا بھلا کہتے رہے۔ حضور (صلی اللہ علیہ وآلہ وسلم) نے ان کو فرمایا : تم جھوٹ بولتے ہو تمہاری یہ بات قبول نہیں کی جاسکتی کیونکہ ابھی تم نے ان کی بہت اچھی طرح تعریف کی ہے۔ لیکن جب وہ ایمان لے آیا تو تم اس کو جھوٹا کہہ رہو اور اس کو برا بھلا کہہ رہے ہو۔ لہٰذا تمہاری یہ بات قبول نہیں کی جائے گی۔
حضرت عوف (رض) فرماتے ہیں چنانچہ ہم نکلے اور تین افراد تھے میں، رسول اللہ (صلی اللہ علیہ وآلہ وسلم) اور عبداللہ بن سلام۔ پھر اللہ پاک نے ان کے بارے میں یہ نازل فرمایا۔
قل ارایتم ان کان من عنداللہ و کفرتم بہ الخ۔ الاحقاف : 10
کہو کہ بھلا دیکھو تو اگر یہ (قرآن) خدا کی طرف ہوا اور تم نے اس سے انکار کیا اور بنی اسرائیل میں سے ایک گواہ اسی کی طرح (کتاب) کی گواہی دے چکا ہے اور ایمان لے آیا ہے۔ اور تم نے سرکشی کی (تو تمہارے ظالم ہونے میں کیا شک ہے) بیشک خدا ظالم لوگوں کو ہدایت نہیں دیتا۔ مسند ابی یعلی، ابن جریر، مستدرک الحاکم، ابن عساکر۔