46316 اسماء بنت ابی بکر (رض) کی روایت ہے کہ رسول کریم (صلی اللہ علیہ وآلہ وسلم) اور میرے والد (ابوبکر (رض)) غار میں تھے ان کے پاس کھانا میں ہی لے جایا کرتی تھی، چنانچہ ایک دن عثمان (رض) رسول اللہ (صلی اللہ علیہ وآلہ وسلم) کی خدمت میں حاضر ہوئے اور عرض کیا : یارسول اللہ ! میں مشرکین سے آپ کے متعلق اذیت بھری باتیں سنتا ہوں، جنہیں سن کر صبر کا پیمانہ لبریز ہوجاتا ہے ، لہٰذا آپ مجھے کہیں بھیج دیں تاکہ میں یہاں سے چلا جاؤں میں ان مشرکین کو محض اللہ کی خاطر ضرور چھوڑ دوں گا۔ نبی کریم (صلی اللہ علیہ وآلہ وسلم) نے ان سے فرمایا اے عثمان ! تم نے پختہ عزم کرلیا ہے ؟ عرض کیا : جی ھاں۔ فرمایا : تم حبشہ میں نجاشی کے پاس چلے جاؤ چونکہ وہ بڑا وفادار ہے اور اپنے ساتھ رقیہ کو بھی لیتے جاؤ اسے اپنے پیچھے مت چھوڑ کر جاؤ۔ اور مسلمانوں میں سے جس کی بھی تمہاری جیسی رائے ہو وہ بھی چلا جائے اور وہ بھی اپنے ساتھ اپنی عورتوں کو لے کر جائیں چنانچہ عثمان (رض) نے نبی کریم (صلی اللہ علیہ وآلہ وسلم) کو الوداع کہا اور آپ کے ہاتھ مبارک چومے رسول اللہ (صلی اللہ علیہ وآلہ وسلم) کو حضرت عثمان (رض) کا پیغام ملا وہ یہ کہ انھوں نے کہا : میں آج رات نکل جاؤں گا اور ہم ایک یا دو راتیں جدہ قیام کریں گے اگر آپ سے تاخیر ہوجائے تو میں جزیرہ باضع میں چلا جاؤں گا۔ اسمائ (رض) کہتی ہیں یہ پیغام میں ہی رسول کریم (صلی اللہ علیہ وآلہ وسلم) کے پاس لے کر آئی تھی آپ نے مجھ سے فرمایا : عثمان اور رقیہ نے کیا کیا ؟ میں نے جواب دیا : وہ دونوں جاچکے ہیں فرمایا : کیا وہ جاچکے ہیں ؟ میں نے کہا : جی ہاں۔ پھر آپ نے ابوبکر (رض) کی طرف متوجہ ہو کر فرمایا : اسماء کہتی ہے کہ عثمان اور رقیہ جاچکے ہیں قسم اس ذات کی جس کے قبضہ قدرت میں میری جان ہے ابراہیم اور لوط کے بعد وہ پہلے شخص ہیں جنہوں نے ہجرت کی ہے۔ رواہ ابن عساکر