46531 زھدم جرمی کی روایت ہے کہ ایک مرتبہ میں حضرت ابوموسیٰ اشعری (رض) کے پاس بیٹھا تھا اتنے میں آپ کے پاس کھانا لایا گیا ، کھانے میں مرغی تھی قبیلہ بنی تمیم اللہ کا ایک شخص کھڑا ہوا اور دستر خوان سے الگ ہوگیا حضرت ابو موسیٰ نے اس سے کہا : دستر خوان کے قریب ہوجاؤ میں نے رسول کریم (صلی اللہ علیہ وآلہ وسلم) کو مرغی تناول فرماتے ہوئے دیکھا ہے۔ اس شخص نے کہا : میں نے مرغی کو گندگی کھاتے دیکھا ہے تب میں نے قسم کھالی کہ میں مرغی نہیں کھاؤں گا۔ ابوموسیٰ (رض) نے فرمایا : قریب ہوجاؤ میں تمہیں تمہاری قسم کے متعلق حدیث سناتا ہوں میں ایک مرتبہ نبی کریم (صلی اللہ علیہ وآلہ وسلم) کی خدمت میں حاضر ہوا اور میرے ساتھ میری قوم کے کچھ لوگ بھی تھے۔ ہم نے عرض کیا : یارسول اللہ ! ہمیں سواری دیں چنانچہ آپ (صلی اللہ علیہ وآلہ وسلم) نے قسم کھالی کہ ہمیں سواری نہیں دیں گے پھر کچھ دیر کے بعد آپ کے پاس مال غنیمت آیا جو اونٹوں کی صورت میں تھا ۔ آپ (صلی اللہ علیہ وآلہ وسلم) نے ہمارے لیے پانچ اونٹوں کا حکم دیا ہم آپس میں کہنے لگے : ہم تو رسول اللہ (صلی اللہ علیہ وآلہ وسلم) کی قسم بھول گئے اللہ کی قسم ! اگر ہم اسی طرح واپس لوٹ گئے تو ہم فلاح نہیں پائیں گے ہم آپ کی طرف واپس لوٹ آئے اور عرض کیا : یا نبی اللہ ! آپ نے تو قسم کھائی تھی کہ آپ ہمیں سواری نہیں دیں گے لیکن پھر آپ نے ہمیں سواری دے دی آپ (صلی اللہ علیہ وآلہ وسلم) نے فرمایا : بلاشبہ اللہ تعالیٰ ہی نے تمہیں سواری عطا کی ہے اور اگر میں کسی چیز پر قسم کھالیتا ہوں پھر اس کے خلاف کرنے میں بہتری سمجھتا ہوں تو وہی کام کرتا ہوں جو بہتر ہوتا ہے۔۔ رواہ عبدالرزاق