4669: ۔۔ ابن عباس (رض) سے مروی ہے کہ ہم لوگ چلے جا رہے تھے اور حضرت حفصہ و عائشہ (رض) کے متعلق بات چیت کر رہے تھے۔ پیچھے سے حضرت عمر (رض) بھی ہمارے ساتھ آ ملے اور ہم نے اس موضوع پر گفتگو بند کردی۔ حضرت عمر (رض) نے فرمایا : کیا بات ہے مجھے دیکھ کر تم لوگ خاموش کیوں ہوگئے ؟ کس چیز کے بارے میں تم بات چیت کر رہے تھے ؟ سب نے کہا : کچھ نہیں یا امیر المومنین ! حضرت عمر (رض) نے ان کو کہا : میں تم کو تاکید کرتا ہوں کہ تم مجھے ضرور بتاؤ کہ کس بارے میں گفتگو کر رہے تھے ؟ تب لوگوں نے کہا : ہم عائشہ، حفصہ اور سودا (رض) کے بارے میں گفتگو کر رہے تھے۔
حضرت عمر (رض) نے فرمایا : میں مدینہ کے کسی گھاس میں تھا کہ عبداللہ بن عمر میرے پاس آیا اور بولا کہ نبی اکرم (صلی اللہ علیہ وآلہ وسلم) نے اپنی عورتوں کو طلاق دے دی ہے۔ حضرت عمر (رض) فرماتے ہیں : میں حفصہ کے پاس پہنچا وہ اپنے آپ کو پیٹ رہی تھی اسی طرح دوسری ازواج مطہرات بھی کھڑی اپنے آپ کو کوس پیٹ رہی تھیں۔ میں نے حفصہ کو کہا : کیا تجھے نبی (صلی اللہ علیہ وآلہ وسلم) نے طلاق دیدی ہے ؟ اگر واقعی نبی (صلی اللہ علیہ وآلہ وسلم) نے تجھے طلاق دیدی ہے تو یاد رکھ میں کبھی بھی تجھ سے بات نہیں کروں گا۔ کیونکہ انھوں نے پہلے بھی تم کو طلاق دیدی تھی۔ وہ تو صرف میرا لحاظ کرکے تم سے رجوع کرلیا تھا۔ حضرت عمر (رض) فرماتے ہیں میں وہاں سے نکلا۔ لوگ مسجد میں ادھر ادھر حلقے لگائے بیٹھے تھے گویا ان کے سروں پر پرندے بیٹھے ہیں۔ (پریشانی کی وجہ سے سب افسردوہ و پریشان تھے) نبی (صلی اللہ علیہ وآلہ وسلم) کمرے کے اوپر بالا خانے میں تشریف فرما تھے۔ میں بھی ایک حلقے میں گیا۔ لیکن میں رنج و غم کی وجہ سے زیادہ دیر بیٹھ نہ سکا اور اٹھ کر اوپر گیا حضور (صلی اللہ علیہ وآلہ وسلم) کے دروازے پر ایک حبشی غلام بیٹھا تھا۔ میں نے کہا : رسول اللہ (صلی اللہ علیہ وآلہ وسلم) پر سلام ہو، اللہ کی رحمت اور اس کی برکت ہو، کیا عمر اندر داخل ہوسکتا ہے ؟ لیکن مجھے کسی نے جواب نہ دیا۔ میں دوبارہ اپنی جگہ آ بیٹھا۔ پیچھے سے قاصد آگیا اور اس نے پوچھا : عمر کہاں ہے ؟ میں کھڑا ہو کر رسول اللہ (صلی اللہ علیہ وآلہ وسلم) کے پاس گیا آپ دھوپ میں بیٹھے تھے۔ میں سلام کے بعد آپ کے پاس بیٹھ گیا۔ آپ کے چہرے پر غصے کے کچھ اثرات تھے۔ میرے دل میں خواہش پیدا ہوئی کہ میں آپ کے غصہ کو زائل کردوں۔ چنانچہ میں آپ (صلی اللہ علیہ وآلہ وسلم) سے بات چیت میں مصروف ہوگیا۔ پھر میں نے آپ سے دریافت کیا : یا رسول اللہ ! کیا آپ نے اپنی عورتوں کو طلاق دے دی ہے ؟
آپ مجھے دیکھیں ! میں حفصہ کے پاس گیا تھا و اپنا سینہ پیٹ رہی تھی۔ میں نے اس سے پوچھا : کیا تجھے نبی (صلی اللہ علیہ وآلہ وسلم) نے طلاق دیدی ہے ؟ اگر واقعۃ آپ (صلی اللہ علیہ وآلہ وسلم) نے تجھے طلاق دیدی ہے تو میں تیرے ساتھ کبھی بات نہیں کروں گا۔ کیونکہ پہلے بھی نبی (صلی اللہ علیہ وآلہ وسلم) نے تجھ کو طلاق دیدی تھی وہ تو صرف میری وجہ سے رجوع کرلیا تھا۔ یہ سن کر آپ (صلی اللہ علیہ وآلہ وسلم) ہنس دیے، اس طرح میں آپ سے بات چیت کرتا رہا اور غصہ کے اثرات آپ کے چہرہ انور سے چھٹتے رہے۔
پھر میں نے آپ (صلی اللہ علیہ وآلہ وسلم) کی خدمت میں عرض کیا : یا رسول اللہ ! کیا آپ نے اپنی عورتوں کو طلاق دیدی ہے ؟ یہ سن کر آپ (صلی اللہ علیہ وآلہ وسلم) پھر غضب ناک ہوگئے اور مجھے فرمایا : میرے پاس سے اٹھ جاؤ۔ حضرت عمر (رض) فرماتے ہیں میں وہاں سے نکل آیا۔ پھر حضور (صلی اللہ علیہ وآلہ وسلم) انتیس یوم تک یونہی ٹھہرے رہے۔ پھر فضل بن عباس آپ کے پاس سے ایک ہڈی لے کر اترے جس میں لکھا تھا :
یا ایہا النبی لم تحرم ما احل اللہ لک تبتغی مرضات ازواجک۔ مکمل سورت تک۔
پھر نبی کریم (صلی اللہ علیہ وآلہ وسلم) نیچے اتر آئے۔ رواہ ابن مردویہ۔