4703: ۔۔ (مسند عمر بن خطاب (رض)) ابو عمران الجونی سے مروی ہے کہ حضرت عمر بن خطاب (رض) ایک راہب کے پاس سے گذرنے لگے تو اسی کے پاس ٹھہر گئے۔ راہب کو حضرت عمر (رض) کے ساتھی نے آواز دی اے راہب یہ امیر المومنین ہیں۔ چنانچہ وہ متوجہ ہوا۔ دیکھا تو اس راہب کا محنت و مشقت اور ترک دنیا کی وجہ سے عجیب حال تھا۔ حضرت عمر (رض) اس کو دیکھ کر رو پڑے۔ آپ (رض) کو کہا گیا : یہ نصرانی ہے۔ حضرت عمر (رض) نے ارشاد فرمایا میں جانتا ہوں لیکن مجھے اس پر خدا کے فرمان کی وجہ سے رحم آگیا، خدا کا فرمان ہے :
عاملۃ ناصبۃ تصلی نارا حامیۃ۔ الغاشیۃ۔ 3 ۔ 4
سخت محنت کرنے والے تھکے ماندے دہکتی آگ میں داخل ہوں گے۔
لہذا مجھے اس کی عبادت میں محنت و ریاضت پر رحم آگیا کہ اس قدر محنت کرنے کے باوجود یہ جہنم میں داخل ہوگا۔ (شعب الایمان للبیہقی، ابن المنذر، مستدرک الحاکم)