4816: ۔۔ ابو ادریس خولانی (رح) سے مروی ہے کہ حضرت ابو الدرداء (رض) دمشق کے کچھ لوگوں کے ساتھ سوار ہو کر مدینہ تشیرف لائے۔ یہ لوگ اپنے ساتھ مصحف شریف بھی لائے تاکہ اس کو ابی بن کعب، زید بن ثابت، علی (رض) اور مدینہ کے دوسرے اہل علم پر پیش کرسکیں۔ لہٰذا ایک دن ان کے ایک ساتھی نے حضرت عمر (رض) کے پاس یہ آیت پڑھی :
اذ جعل الذین کفروا فی قلوبہم الحمیۃ حمیۃ الجاھلیۃ ( ولو حمیتم کما حموا الفسد المسجد الحرام)
(جبکہ آخری خط کشیدہ حصہ مشہور قراءت میں نہیں ہے) لہٰذا حضرت عمر (رض) نے ان سے پوچھا تم کو یہ کس نے پڑھایا ہے ؟ انھوں نے جواب دیا : ابی بن کعب (رض) نے حضرت عمر (رض) نے مدینہ کے ایک شخص کو کہا کہ ابی بن کعب کو بلا کر لاؤ اور دمشقی ساتھی کو کہا تم بھی ان کے ساتھ جاؤ۔ چنانچہ دونوں نے ابی بن کعب (رض) کو اپنے گھر کے پاس اپنے اونٹ کو تیل ملتا ہوا دیکھا۔ دونوں نے آپ (رض) کو سلام پیش کیا۔ مدنی شخص نے آپ کو حضرت عمر (رض) کے بلاوے کا پیغام دیا۔ ابی (رض) نے دریافت فرمایا : امیر المومنین نے مجھے کیوں بلایا ہے ؟ مدنی شخص نے اپنے ساتھ دمشقی شخص کے بارے میں آگاہ کیا۔ حضرت ابی (رض) نے دمشقی شخص کو (سرزنش کرتے ہوئے) فرمایا : اے قافلہ والو ! تم لوگ مجھے تکلیف پہنچانے سے باز نہیں آؤگے ؟ پھر حضرت ابی (رض) حضرت عمر (رض) کے پاس آئے۔ حضرت عمر (رض) نے کپڑے سمیٹ رکھے تھے اور ہاتھوں پر تیل لگا ہوا تھا (اونٹوں کو لگانے کے لیے) حضرت عمر (رض) نے دمشقی ساتھیوں کو فرمایا : پڑھو : انھوں نے اسی طرح پڑھا :
ولو حمیتم کما حموا لفسد المسجد الحرام۔
حضرت ابی (رض) نے فرمایا : میں نے ہی ان کو یوں پڑھایا ہے۔ حضرت عمر (رض) نے حضرت زید (رض) کو حکم دیا تم پڑھو۔ حضرت زید (رض) نے عام قراءت پڑھ کر سنا دی۔ حضرت عمر (رض) نے فرمایا : اے اللہ میں تو اسی کو جانتا ہوں۔ حضرت ابی (رض) نے فرمایا : اللہ کی قسم ! اے عمر ! تم جانتے ہو کہ میں (دربار رسول میں) حاضر رہتا تھا جبکہ تم لوگ غائب رہتے تھے، مجھے بلا لیا جاتا تھا اور تم کو روک دیا جاتا تھا۔ اس کے باوجود میرے ساتھ ایسا برتاؤ کیا جاتا ہے۔ اللہ کی قسم ! اگر تم چاہو تو میں اپنے گھر کو لازم پکڑ لیتا ہوں اور کسی کو کچھ نہیں بتاؤں گا۔ (رواہ ابن ابی داود)