4959: ۔۔ (ابو ایوب (رض)) حضرت ابو ایوب انصاری (رض) سے مروی ہے کہ رسول اللہ (صلی اللہ علیہ وآلہ وسلم) مدینہ تشریف لائے اور ابو ایوب کے گھر ٹھہرے۔ رسول اللہ (صلی اللہ علیہ وآلہ وسلم) نیچے کمرے میں قیام پذیر ہوئے جبکہ ابو ایوب کا گھرانہ اوپر کمرے میں تھا۔ جب شام ہوئی اور رات آئی تو ابو ایوب کو یہ خیال آنے لگا کہ وہ کمرے کے اوپر ہیں اور رسول اللہ (صلی اللہ علیہ وآلہ وسلم) ان کے نیچے کمرے میں ہیں یوں وہ آپ (صلی اللہ علیہ وآلہ وسلم) اور وحی کے درمیان ہیں۔ لہٰذا ابو ایوب سو نہ سکے اس ڈر سے کہ کہیں (سوتے ہوئے ان کے حرکت کرنے سے) اپ (صلی اللہ علیہ وآلہ وسلم) پر گردو غبار نہ گرے اور آپ (صلی اللہ علیہ وآلہ وسلم) کو اذیت پہنچے۔ جب صبح ہوئی تو یہ حضور (صلی اللہ علیہ وآلہ وسلم) کی خدمت میں آئے اور عرض کیا ! یا رسول اللہ ! رات بھر میں پلک جھپکا سکا اور نہ ام ایوب حضور (صلی اللہ علیہ وآلہ وسلم) نے پوچھا وہ کیوں اے ابو ایوب ؟ عرض کیا : مجھے یہ خیال آتا رہا کہ میں کمرے کے اوپر ہوں اور آپ نیچے ہیں کہیں میرے حرکت کرنے سے گرد و غبار نیچے نہ گرے یوں میرا حرکت کرنا آپ کو اذیت پہنچانے اور (یوں بھی اوپر ہونے کی وجہ سے) میں آپ کے اور وحی کے درمیان حائل ہوں۔
حضور (صلی اللہ علیہ وآلہ وسلم) نے ارشاد فرمایا : اے ابو ایوب ! ایسا نہ کیا کر ! پھر فرمایا : کیا میں تجھے ایسے کلمات نہ سکھاؤں جن کو تو صبح و شام دس دس بار پڑھ لیا کرے تو تجھے دس نیکیاں عطا ہوں گی، دس برائیاں تری مٹا دی جائیں، دس درجات تیرے بلند کیے جائیں اور قیامت کے دن وہ کلمات تیرے لیے دس غلام آزاد کرنے کے برابر اجر کا باعث بنیں ؟ پس تو یہ کہا کر :
لا الہ الا اللہ، لہ الملک، ولہ الحمد لا شریک لہ، الکبیر للطبرانی۔