4987: ۔۔ ابن عباس (رض) سے مروی ہے کہ مجھے (میرے والد) عباس (رض) نے حضور (صلی اللہ علیہ وآلہ وسلم) کے پاس کسی کام سے بھیجا میں شام کے وقت آپ کے گھر پہنچا۔ آپ (صلی اللہ علیہ وآلہ وسلم) میری خالہ ام المومنین میمونہ (رض) کے پاس تھے۔ (میں رات کو وہیں ٹھہر گیا) رات کو رسول اللہ (صلی اللہ علیہ وآلہ وسلم) رات کی نماز (تہجد ) ادا کی پھر اس کے بعد دو رکعت سنت فجر ادا کی اس کے بعد یہ دعا کی :
اللھم انی اسالک رحمۃ من عندک تھدی بھا قلبی و تجمع بھا امری۔
اے اللہ میں تجھ سے تیری رحمت کا سوال کرتا ہوں اس کے طفیل تو میرے دل کو ہدایت دے اور میرے معاملہ کو مجتمع کردے۔
نوٹ : ۔۔۔ علامہ علاء الدین المتقی بن حسان الدین مولف کنزا لعمال (رح) فرماتے ہیں علامہ سیوطی (رح) نے اس دعا کو مکمل جو بڑی طویل ہے اپنی کتاب جامع صغیر میں نقل فرما دیا ہے اور جامع صغیر کے اس موضوع سے متعلق حصہ کو ہم اپنی اس کتاب میں ذکر کر آئے ہیں لہٰذا یہ دعا وہیں ملاحظہ فرمائیں۔
تنبیہ : ۔۔ مترجم محمد اصغر عرض کرتا ہے کہ آئندہ کی حدیث نمبر 4988 میں اسی کے قریب الفاظ پر مشتمل دعا منقول ہے نیز جس دعا کے گذرنے کا مولف کنز (رح) فرما رہے ہیں وہ حدیث 3608 پر گذر چکی ہے۔ دونوں دعائیں معمولی فرق کے ساتھ منقول ہیں۔