5055: ۔۔ حکیم ترمذی اپنی کتاب نوادر الاصول فرماتے ہیں : عمرو بن ابی عمرو، ابو ہمام الدلال، ابراہیم بن طہمان ، عاصم بن ابی النجود، زر بن حبیش (کی سند کے ساتھ) حضرت علی (رض) سے مروی ہے کہ رسول اللہ (صلی اللہ علیہ وآلہ وسلم) کے پاس تشریف لائے اسی دوران میں حضرت ابو زر (رض) بھی حضور (صلی اللہ علیہ وآلہ وسلم) کی طرف متوجہ ہوئے۔ حضرت جبرائیل (علیہ السلام) نے ابو ذر (رض) کو دیکھا تو فرمایا : یہ ابو ذر ہیں ؟ حضور (صلی اللہ علیہ وآلہ وسلم) فرماتے ہیں : میں نے پوچھا : اے امین اللہ (جبرئیل (علیہ السلام)) کیا تم ابو ذر کو جانتے ہو ؟ جبرائیل (علیہ السلام) نے فرمایا : قسم اس ذات کی جس نے آپ کو حق کے ساتھ مبعوث فرمایا ان کو زمین والوں سے زیادہ آسمان والے جانتے ہیں۔ یہ اس وجہ سے کہ یہ ایک دعا دن میں دو مرتبہ کیا کرتے ہیں۔ جس پر ملائکہ بھی فخر فرماتے ہیں۔ لہٰذا آپ بھی ان کو بلا کر ان سے اس دعا کے بارے میں پوچھ لیں۔
حضور (صلی اللہ علیہ وآلہ وسلم) نے ان کو بلایا : اے ابو ذر ! کوئی ایسی دعا ہے جو تم دن میں دو مرتبہ مانگا کرتے ہو ؟ انھوں نے عرض کیا : جی ہاں ! آپ پر میرے ماں باپ قربان ہوں۔ میں نے وہ کسی انسان سے نہیں سنی، بلکہ پروردگار نے مجھے الہام فرمائی ہے اور وہ دعا میں دن میں دو مرتبہ مانگا کرتا ہوں۔ سب سے پہلے میں قبلہ رو ہوتا ہوں پھر جی بھر کر اللہ کی تسبیح و تہلیل اور تحمید و تکبیر کرتا ہوں پھر وہ دعا مانگتا ہوں جو دس کلمات پر مشتمل ہے :
اللھم انی اسالک ایمانا دائما، واسالک قلبا خاشعا، واسالک علما نافعا، واسالک یقیناً صادقا، واسالک دینا قیما، واسالک العافیۃ من کل بلیۃ، واسالک تمام العافیۃ، واسالک دوام العافیۃ، واسالک الشکر علی العاقبۃ، واسالک الغنی علی الناس۔
اے اللہ ! میں تجھ سے دائمی ایمان کا سوال کرتا ہوں، علم نافع کا سوال کرتا ہوں، سچے یقین کا سوال کرتا ہوں، مضبوط اور سیدھے دین کا سوال کرتا ہوں، ہر مصیبت سے عافیت کا سوال کرتا ہوں، کامل عافیت ا سوال کرتا ہوں، ہمیشہ رہنے والی عافیت کا سوال کرتا ہوں، عافیت پر شکر کی توفیق کا سوال کرتا ہوں، اور لوگوں سے بےنیاز کا سوال کرتا ہوں۔
جبرئیل (علیہ السلام) نے فرمایا : قسم اس ذات پاک کی، جس نے آپ کو حق کے ساتھ نبی بنا کر بھیجا ہے، آپ کا کوئی امتی یہ دعا نہیں کرتا مگر اس کے سارے گناہ بخش دیے جاتے ہیں، خواہ وہ سمندر کی جھاگ سے زیادہ ہوں یا مٹی کے ذرات سے زیادہ ہوں۔ اور آپ کا کوئی امت اس دعا کو لے کر خدا کے پاس نہیں آئے گا مگر جنتیں اس کی مشتاق ہوں گی، فرشتے اس کے لیے بخشش کی دعا کریں گے، جنت کے سب دروازے اس کے لیے کھول دیے جائیں اور فرشتے اس کو کہیں گے : اے اللہ کے ولی ! جس دروزے میں چاہے داخل ہوجا۔