5056: ۔۔ حضرت علی (رض) سے مروی ہے کہ رسول اللہ (صلی اللہ علیہ وآلہ وسلم) نے ارشاد فرمایا :
فاتحۃ الکتاب (سورة فاتحہ) آیۃ الکرسی، اور آل عمران کی دو آیات۔
شھد اللہ انہ لا الہ الا ھو الخ۔۔۔ (مکمل آیت)
اور قل اللھم مالک الملک ۔۔ سے۔۔ وترزق من تشاء بغیر الحساب تک۔ (مکمل آیت)
یہ سب آیات عرش سے متعلق ہیں۔ ان کے اور اللہ کے درمیان کوئی پردہ نہیں ہے۔ یہ اللہ کی بارگاہ میں عرض کرتی ہیں : اے اللہ ! تو ہم کو زمین پر اتارتا ہے ؟ اور ان لوگوں پر اتارتا ہے جو تیری نافرمانی کرتے ہیں ؟ اللہ عزوجل نے فرمایا : میں نے قسم اٹھائی ہے تم کو میرا جو بندہ بھی (فرض) نمازوں کے بعد تلاوت کرے گا خواہ اس کے اعمال کیسے ہوں میں اس کو جنت میں داخل کردوں گا، اس کو حظیرۃ القدس میں اتار دوں گا، دشمن سے اس کو پناہ دوں گا اور اس کی مدد کروں گا۔ (ابن حبان فی الضعفاء، ابن السنی فی عمل یوم ولیلۃ، ابو منصور السحابی فی الاربعین)
کلام : ۔۔ امام ابن جوزی (رح) نے اس روایت کو موضوعات میں شمار کیا ہے اور فرمایا ہے کہ اس میں ایک روای حارث بن عمیر متفرد ہے جو ثقہ رایوں کی جانب سے من گھڑت روایتیں پیش کرتا ہے، حافظ ابو الفضل عراق سے اس روایت کے بارے میں پوچھا گیا تو انھوں نے فرمایا : اس کے روایت کو متقدمین نے ثقہ قرار دیا ہے لیکن متاخرین نے کچھ راویوں میں کلام کیا ہے اور اس میں محل نظر صرف دو اشخاص ہیں : محمد بن زنبور مکی اور حارث بن عمیر۔ دونوں کو کچھ ائمہ نے ثقہ قرار دیا ہے اور اول کو ابن خزیمہ (رح) نے اور موخر الذکر کو امام ابن حبان اور امام احاکم نے ضعیف قرار دیا ہے۔ حافظ ابن حجر نے اس کو اپنی امالیہ میں ذکر فرمایا ہے اور فرمایا کہ ہم حارث میں کسی متقدم کا کوئی طعن نہیں پاتے بلکہ حماد بن زیدان کی تعریف کرتے ہیں جو ان سے بڑے ہیں اور نقاد ابن معید ان کی توثیق فرماتے ہیں۔
نیز ابو حاتم اور نسائی نے بھی ان کی توثیق فرمائی۔ بخاری و ابن حبان نے تعلیقا ان کو ذکر کیا، دیگر اصحاب سنن نے ان کی روایات لی۔ لیکن ابن حبان (رح) نے ان کو ضعفاء میں شمار کیا اور ان کی توہین میں کافی زیادتی کی ہے اور حارث سے اوپر کے راویوں کے بارے میں تو بات ہی نہیں کی جاسکتی ان کی عظمت شان کی وجہ سے۔ نیز حافظ ابن حجر (رح) ابن جوزی (رح) کے اس کو موضوع شمار کرنے کے حوالہ سے فرماتے ہیں : ابن جوزی (رح) نے اس کو موضوعات میں شمار کرکے افراط کیا ہے شاید انھوں نے اس حدیث کے ثواب کو بہت زیادہ سمجھ لیا تھا ورنہ راوی تو آپ کو معلوم ہی گئے (کہ معمولی اختلاف کے علاوہ سب صحیح ہیں)