٨٦٤٥۔۔۔ حضرت ابوسعید (رض) سے روایر ہے کہ رسول اللہ (صلی اللہ علیہ وآلہ وسلم) کے پاس آئے اور آپ بخار میں مبتلا تھے آپ پر ایک چادر تھی، آپ نے ان پر اپنا ہاتھ رکھا ےتو بخار کی حرارت چادر کے اوپر سے محسوس ہورہی تھی، تو حضرت ابوسعید (رض) نے عرض کیا : یارسول اللہ ! آپ کو کتنا سخت بخار ہے ؟ آپ (صلی اللہ علیہ وآلہ وسلم) نے فرمایا : ہم پر ایسے ہی سختی کی جاتی ہے اور ہمیں دوگنااجر دیا جاتا ہے۔
پھر وہ عرض کرنے لگے : یارسول اللہ ! سب سے زیادہ آزمائش والاکون ہے ؟ آپ نے فرمایا : انبیاء (علیہم السلام) عرض کیا پھر کون ؟ آپ نے فرمایا : صلحاء (جو جان بوجھ کر گناہ نہیں کرتے) ان میں سے کوئی تو فقروفاقہ میں مبتلا ہوا کہ صرف ایک قبا لے کر پھرتا رہا پھر اسے پہن لیا اور کوئی جوؤں کی بیماری میں مبتلا ہوا جسے ان جوؤں نے ہلاک کردیا، ان میں سے ہر ایک آزمائش پر اس طرح خوش ہوتا جیسے تم عطا پر خوش ہوتے ہو۔ (بیھقی فی الشعب)
تشریح :۔۔۔ لیکن آج کی دنیا میں کوئی بھی اس مصیبت و آزمائش میں مبتلا نہیں ہوگا کیونکہ آج کل کے لوگوں میں اس کی اہلیت نہیں ، اس لیے آپ نے فرمایا : میری امت کے آخری لوگ فقروفاقہ میں مبتلا نہیں ہوں گے۔