Maarif ul Hadith: Hadith 736

حضرت جابر رضی اللہ عنہ سے روایت ہے کہ رسول اللہ صلی اللہ علیہ وسلم عید کے دن راستہ بدل دیتے تھے ۔ (صحیح بخاری)

تشریح
مطلب یہ ہے کہ رسول اللہ صلی اللہ علیہ وسلم عید کی نماز کے لئے جس راستہ سے عیدگاہ تشریف لے جاتے تھے ، واپسی میں اس کو چھوڑ کر دوسرے راستہ سے تشریف لاتے تھے ۔ علماء نے اس کی مختلف حکمتیں بیان کی ہیں ۔ اس عاجز کے نزدیک ان میں سے زیادہ قرین قیاس یہ ہے کہ آپ صلی اللہ علیہ وسلم یہ اس لئے کرتے تھے کہ اس طرح شعائر اسلام اور مسلمانوں کی اجتماعیت و شوکت کا زیادہ سے زیادہ اظہار و اعلان ہو ۔ نیز عید میں جشن اور تفریح کا جو پہلو ہے اس کے لئے بھی یہی زیادہ مناسب ہے ، کہ مختلف راستوں اور بستی کے مختلف حصوں سے گزرا جائے ۔ واللہ اعلم ۔