Maarif ul Hadith: Hadith 799

حضرت عائشہ صدیقہ رضی اللہ عنہا سے روایت ہے کہ رسول اللہ صلی اللہ علیہ وسلم (وصال کے بعد) تین سفید یمنی کپڑوں میں کفنائے گئے جو سحولی تھے ، ان تین کپڑوں میں نہ تو کرتا تھا اور نہ عمامہ ۔ (صحیح بخاری و صحیح مسلم)

تشریح
اکثر شارحین نے سحولی کی تشریح میں کہا ہے کہ یمن کے علاقہ میں سحول ایک بستی تھی جہاں کے کپڑے مشہور تھے ۔ بعض حضرات نے اس کے دوسرے معنی بھی بیان کئے ہیں ، لیکن راجح یہی ہیں ۔ رسول اللہ صلی اللہ علیہ وسلم وفات سے پہلے بھی یمنی چادریں استعمال فرماتے تھے ، وصال کے بعد آپ کے کفن میں بھی وہی استعمال کی گئیں اور آپ صلی اللہ علیہ وسلم کو تین کپڑوں میں کفنایا گیا جس میں نہ کرتا تھا اور نہ عمامہ ۔ اور مردوں کے لئے کفن کے تین ہی کپڑے مسنون ہیں ۔