Muawtta Imam Muhammad: Hadith 350

عطاء بن یسار سے روایت ہے کہ ایک مرد نے رمضان میں روزہ کی حالت میں اپنی بیوی کا بوسہ لیا لیا اور اسے اس کے باعث شدید غم ہوا۔ اس نے اپنی بیوی کو کہا کہ اس کے متعلق جاکر سوال کرو۔ پس وہ عورت رسول اللہ (صلی اللہ علیہ وآلہ وسلم) کی زوجہ محترمہ ام المؤمنین ام سلمہ (رض) عنہا کے پاس حاضر ہوئی اور ان سے اپنے اس واقعہ کا تذکرہ کیا۔ ام سلمہ (رض) عنہا نے بتلایا کہ رسول اللہ (صلی اللہ علیہ وآلہ وسلم) روزے کی حالت میں بوسہ لے لیتے ہیں۔ وہ عورت اپنے خاوند کے پاس واپس آگئی اور اسے یہ بات بتائی تو اس کا رنج اور بڑھ گیا اور کہنے لگا کہ ہم رسول اللہ (صلی اللہ علیہ وآلہ وسلم) کی مانند نہیں ہیں۔ اللہ تعالیٰ اپنے رسول (صلی اللہ علیہ وآلہ وسلم) کے لیے جو چاہے حلال کرسکتا ہے۔ پھر اس کی بیوی ام سلمہ (رض) عنہا کے پاس واپس گئی تو وہاں رسول اللہ (صلی اللہ علیہ وآلہ وسلم) کو موجود پایا۔ رسول اللہ (صلی اللہ علیہ وآلہ وسلم) نے فرمایا اس عورت کو کیا کام ہے ؟ ام سلمہ (رض) عنہا نے آپ (صلی اللہ علیہ وآلہ وسلم) کو بتلایا تو رسول اللہ (صلی اللہ علیہ وآلہ وسلم) نے فرمایا کہ تو نے اسے یہ کیوں نہ بتلایا کہ میں بھی ایسا کرتا ہوں ؟ ام سلمہ (رض) عنہا نے کہا میں نے اسے بتایا تھا یہ اپنے خاوند کے پاس گئی اور اسے اس بات کی خبر دی۔ تو اس کا رنج و غم اور بڑھ گیا اور اس نے کہا کہ ہم رسول اللہ (صلی اللہ علیہ وآلہ وسلم) کی مانند نہیں ہیں۔ اللہ تعالیٰ اپنے رسول (صلی اللہ علیہ وآلہ وسلم) کے لیے جو چاہے حلال کردے۔ پس رسول اللہ (صلی اللہ علیہ وآلہ وسلم) ناراض ہوئے اور فرمایا۔ اللہ کی قسم میں تم سب سے زیادہ اللہ تعالیٰ کا خوف رکھتا ہوں اور اس کی حدود کو زیادہ جانتا ہوں۔ (اس روایت کو امام مالک نے باب ما جاء فی الرخصۃ فی القبلۃ للصائم میں ذکر کیا ہے) ۔