Muawtta Imam Muhammad: Hadith 687

ابوبکر بن عبد الرحمن نے عمرہ بنت عبد الرحمن سے نقل کیا کہ حضرت عثمان غنی (رض) کے زمانہ خلافت میں ایک چور نے ایک ترنج چرالیا حضرت عثمان (رض) نے اس کی قیمت لگانی کا حکم دیا۔ اس کی قیمت بارہ درہم فی دینار کے حساب سے تین درہم لگائی گئی۔ حضرت عثمان (رض) نے اس کا ہاتھ کاٹ دیا۔ ( اس روایت کو باب ما یجب فیہ القطع میں ذکر کیا ہے)
قول محمد (رح) یہ ہے : کہ لوگوں کا اس بارے میں اختلاف ہے کہ کس قدر چوری کرنے پر ہاتھ کاٹا جائے۔ اہل مدینہ کا قول یہ ہے کہ ربع دینار پر ہاتھ کاٹا جائے اور اس کی تائید میں مندرجہ بالا روایات پیش کرتے ہیں۔ اور اہل عراق کے نزدیک دس درہم سے کم میں ہاتھ نہیں کاٹا جائے گا۔ ور اس کے متعلق نبی اکرم (صلی اللہ علیہ وآلہ وسلم) ، عمر فاروق، عثمان غنی، علی مرتضی، عبداللہ بن مسعود (رض) عنہم سے احادیث مروی ہیں۔ پس جب حدود میں اختلاف ہوجائے تو پختہ کو اختیار کیا جائے گا اور یہی امام ابوحنیفہ (رح) اور عام فقہاء کا قول ہے۔