عبداللہ بن دینار نے عبداللہ بن عمر (رض) سے روایت نقل کی کہ رسول اللہ (صلی اللہ علیہ وآلہ وسلم) نے فرمایا۔ اس امت کا زمانہ گزشتہ امتوں کے مقابلے میں اس طرح ہے۔ جیسے عصر سے مغرب تک وقت۔ اور ( اجر کے سلسلہ میں ) تمہاری اور یہود و نصاری کی مثال اس طرح ہے۔ جیسے کسی نے مزدور کام پر لگایا۔ اور اعلان کیا کہ کون صبح سے لے کر نصف دن تک مزدوری کرے گا۔ اور مزدوری ایک قیراط ہوگی۔ چنانچہ یہود نے مزودوری کی پھر مالک نے اعلان کیا کون نصف دن سے لی کر عصر تک مزودری کرے گا اور مزودری ایک قیراط ہوگی۔ چنانچہ نصاریٰ نے ایک قیراط کے بدلے عصر تک کام کیا۔ پھر آقا نے اعلان کیا کہ کون عصر سے مغرب تک مزدوری کرے گا۔ اور مزودری دو قیراط ہوگی۔ خبردار اچھی طرح آگاہ ہوجاؤ! تم ہی وہ لوگ ہو جنہوں نے عصر سے مغرب تک مزودری دو قیراط کے بدلے میں کی ہے۔
آپ (صلی اللہ علیہ وآلہ وسلم) نے فرمایا اس پر یہود و نصاریٰ کو ناراضگی پیدا ہوئی۔ وہ کہنے لگے ہمارا کام زیادہ اور مزودری کم ملی۔ مالک نے جواب دیا کیا میں نے تم پر ظلم کیا اور تمہارے حقوق میں سے کوئی چیز کم کی انھوں نے جواب میں کہا نہیں۔ تو مالک نے جواب دیا پھر یہ تو میرا فضل ہے۔ وہ جس کو میں چاہتا ہوں دیتا ہوں۔
(یہ روایت حدیث القیراط کے نام سے مشہور ہے جیسا کہ بخاری، مسلم، ترمذی نے ذکر کیا ہے)
قول محمد (رح) یہ ہے : کہ یہ روایت دلالت کر رہی ہے کہ عصر کو مؤخر کرکے پڑھنا اس کو جلد پڑھنے سے افضل ہے۔ ذرا غور کرو کہ ظہر اور عصر کے درمیانی وقت کو عصر و مغرب کے درمیانی وقت سے اس حدیث میں زیادہ قرار دیا گیا ہے۔ جس شخص نے عصر کو جلدی پڑھا تو اس کا ظہر سے عصر تک کا وقت عصر و مغرب کے درمیانی وقت سے کم ہوگا۔ اور عصر کے وقت سے عصر کا وہ وقت جس میں سورج کی دھوپ سفید اور صاف ستھری ہوتی ہے۔ اس میں زردی کی ملاوٹ نہیں ہوتی۔ اور یہی امام ابوحنیفہ (رح) اور ہمارے عام فقہاء (رح) اجمعین کا قول ہے۔