حضرت عبداللہ بن عباس (رض) روایت کرتے ہں کہ میں نے اپنی خالہ میمونہ ام المؤمنین (رض) عنہا کے ہاں رات گزاری۔ ابن عباس (رض) ( سونے کی کیفیت نقل کرتے ہیں) کہ میں تکیہ کی چوڑائی والی جانب لیٹا ( جدھر سونے والے کا سر ہوتا ہے) اور رسول اللہ (صلی اللہ علیہ وآلہ وسلم) اور آپ کے اہل خانہ گدے کے طول کی جانب آرام فرما ہوئے۔ رسول اللہ (صلی اللہ علیہ وآلہ وسلم) نصف رات تک سوئے یا اس سے کچھ کم یا زیادہ ، پھر رسول اللہ (صلی اللہ علیہ وآلہ وسلم) بیدار ہوئے اور اپنی آنکھیں ملیں اور سورة آل عمران کی دس آخری آیات تلاوت فرمائیں، پھر ایک لٹکی مشک کی طرف اٹھے اور اس سے خوب تر انداز سے وضو فرمایا۔ پھر نماز کے لیے کھڑے ہوگئے۔ ابن عباس (رض) کہتے ہیں کہ میں بھی اٹھا اور آپ (صلی اللہ علیہ وآلہ وسلم) کی طرح کیا۔ پھر میں آپ کے پہلو میں جا کھڑا ہوا، رسول اللہ (صلی اللہ علیہ وآلہ وسلم) نے اپنا دایاں دست اقدس میرے سر پر رکھا اور میرا دایاں کان پکڑ کر مروڑ ا پھر آپ (صلی اللہ علیہ وآلہ وسلم) نے دو رکعت نماز ادا فرمائی پھر دور رکعتیں، پھر اور ردو رکعتیں، پھر مزید دو رکعتیں پھر اور دو رکعتیں ادا فرمائیں، پھر اور دو رکعتیں پڑھیں۔ پھر وتر ادا فرمائے اور آرام فرمانے کے لیے لیٹ گئے۔ یہاں تک کہ مؤذن آپ (صلی اللہ علیہ وآلہ وسلم) کے پاس (اطلاع دینے) آیا تو آپ (صلی اللہ علیہ وآلہ وسلم) نے دو ہلکی رکعتیں ادا فرمائیں۔ پھر حجرہ مبارک سے باہر تشریف لائے اور نماز فجر ادا فرمائی۔
(اس روایت کو امام مالک (رح) نے باب صلوۃ النبی (صلی اللہ علیہ وآلہ وسلم) فی الوتر میں درج فرمایا ہے) ۔
قول محمد (رح) یہ ہے : رات کی نماز ہمارے (صاحبین) کے ہاں دو دو رکعات ہے اور ابوحنیفہ (رح) فرماتے ہیں کہ رات کی نماز چاہو تو دو دو رکعت پڑھو، اور اگر چاہو تو چار چار پڑھو، اور اگر چاہو تو چھ چھ اور آٹھ آٹھ بھی پڑھ سکتے ہو۔ ایک تحریمے سے بھی پڑھ سکتے ہو مگر افضل چار چار کو ایک تحریمہ سے ادا کرنا ہے۔
البتہ وتر میں ہمارے قول اور امام ابوحنیفہ (رح) کے قول میں فرق نہیں ہے۔ وتر کی تعداد تین ہے جن کے درمیان سلام سے فاصلہ نہ کیا جائے گا۔