عبید اللہ بن عبداللہ بن عتبہ نے ابوہریرہ (رض) سے اور زید بن خالد جہنی (رض) سے نقل کیا کہ دو آدمی رسول اللہ (صلی اللہ علیہ وآلہ وسلم) کی خدمت میں جھگڑتے ہوئے آئے۔ ان میں سے ایک نے عرض کیا۔ اے اللہ کے نبی (صلی اللہ علیہ وآلہ وسلم) ہمارے درمیان کتاب اللہ کے مطابق فیصلہ فرمادیں۔ دوسرے نے کہا اور وہ دونوں میں زیادہ سمجھ دار تھا ۔ ہاں یا رسول اللہ ! ہمارے درمیان کتاب اللہ سے فیصلہ فرمادیں۔ لیکن مجھے بات کرنے کی اجازت مرحمت فرمائیں۔ آپ (صلی اللہ علیہ وآلہ وسلم) نے فرمایا۔ کہو ! اس نے کہا میرا بیٹا اس کے ہاں مزدوری کرتا تھا۔ یعنی مزدور ملازم تھا۔ اس نے اس کی بیوی سے زنا کرلیا۔ مجھے لوگوں نے بتلایا کہ میرے بیٹے پر سو کوڑے لازم ہیں۔ میں نے اس کے فدیہ میں سو بکریاں اور اپنی ایک لونڈی آزاد کردی۔ پہر میں نے اہل علم سے اس کے متعلق دریافت کیا تو انھوں نے بتلایا کہ میرے بیٹے پر سو کوڑے اور ایک سال کی جلا وطنی ہے۔ اور اس کی بیوی پر رجم ہے نبی اکرم (صلی اللہ علیہ وآلہ وسلم) نے فرمایا قسم ہے اس ذات کی جس کے قبضہ قدرت مں میری جان ہے۔ میں تمہارے درمیان کتاب اللہ کے مطابق فیصلہ کروں گا۔ پس تمہارے سو بکریاں اور لونڈی تمہیں واپس کی جاتی ہے۔ اور بیٹے کو سو کوڑے مارے جائیں۔ اور ایک سال کے لیے جلا وطنی دے دی جائے۔ رسول اللہ (صلی اللہ علیہ وآلہ وسلم) نے انیس اسلمی (رض) کو حکم فرمایا کہ دوسرے آدمی کی عورت کے پاس جاکر دریافت کرو۔ اگر وہ زنا کا اعتراف کرے تو اسے رجم کردیا جائے۔ اس عورت نے اعتراف کرلیا چنانچہ اسے سنگسار کردیا گیا۔ (انیس (رض) کو بھیجنے کی وجہ یہ تھی کہ عورت کے اعتراف کے بغیر اس پر حد نہ لگ سکتی تھی۔ جب اعتراف کرلیا تو حد لگادی گئی۔ فافہم و تدبر)
(اس روایت کو باب ما جاء فی الرجم میں امام مالک (رح) لائے ہیں)