قبیصہ بن ذویب سے روایت ہے کہ مرنے والے کی نانی حضرت ابوبکر (رض) کے پاس ترکہ حاصل کرنے گئی تو آپ نے فرمایا۔ کتاب اللہ میں تیرا کوئی ترکہ مذکورہ نہیں ہے۔ اور نہ ہی ہمارے علم میں ہے۔ کہ رسول اللہ (صلی اللہ علیہ وآلہ وسلم) کی سنت میں تیرا کوئی حصہ مقرر کیا گیا ہو۔ تم واپس چلی جاؤ یہاں تک کہ میں لوگوں سے دریافت کرلوں۔ پھر آپ نے لوگوں سے اس سلسلہ میں دریافت کیا۔ تو مغیر بن شعبہ (رض) نے کہا ایک نانی رسول اللہ (صلی اللہ علیہ وآلہ وسلم) کی خدمت میں حاضر ہوئی تھی۔ حضور (صلی اللہ علیہ وآلہ وسلم) نے اسے چھٹا حصہ دلایا تھا۔ آپ نے فرمایا کیا تمہارے ساتھ اس واقعہ میں کوئی شاہد موجود ہے۔ تو حضرت محمد بن مسلمہ انصاری (رض) کھڑے ہوئے اور انھوں نے بھی یہی بیان کیا۔ حضرت ابوبکر (رض) نے اس کو نافذ کردیا۔ حضرت عمر (رض) کے عہد میں ایک دادی اپنا ترکہ حاصل کرنے کے لیے آئی آپ نے فرمایا کتا اللہ میں تمہارا کوئی حصہ نہیں ہے۔ اور جو فیصلہ اس سے پہلے رسول اللہ (صلی اللہ علیہ وآلہ وسلم) اور ابوبکر (رض) نے کیا وہ تیرے علاوہ نانی کے حق میں کیا گیا ہے۔ اور میں فرائض میں اس چھٹے حصہ کے علاوہ زیادتی کرنے والا نہیں ۔ اگر تم دونوں دادی اور نانی موجود ہو تو دونوں بانٹ لو۔ اگر تم دونوں میں صرف ایک ہے تو وہ اکیلی چھٹا حصہ لے لے۔ (اس اثر کو امام مالک نے باب میراث الجدہ میں ذکر کیا ہے) ۔
قول محمد (رح) یہ ہے : ہم اسی کو اختیار کرتے ہیں۔ جب نانی اور دادی دونوں موجو ہوں تو چھٹا حصہ دونوں میں بانٹ کر تقسیم کردیا جائے گا۔ اور اس کے ساتھ پر دادی اور پرنانی کو کچھ نہ ملے گا ( کیونکہ حصہ اقرب کی طرف جاتا ہے) یہی امام ابوحنیفہ (رح) اور ہمارے عام فقہاء کا مختار قول ہے۔