ابوبکر بن عمر بن حزم بیان کرتے تھے کہ حضرت عمر (رض) فرماتے تھے۔ عجیب بات یہ ہے کہ پھوپھی کا وارث بھتیجا ہوتا ہے لیکن پھوپھی خود وارث نہیں ہوتی ( اس اثر کو امام مالک (رح) نے باب ما جاؤ فی العمۃ میں ذکر کیا ہے)
قول محمد (رح) یہ ہے : حضرت عمر (رض) نے جو یہ فرمایا کہ بھتیجا پھوپی کا وارث ہوتا ہے اور وہ اس کی وارث نہیں ہوتی۔ شاید یہ اس لیے فرمایا ہے کہ بھتیجا اس کے ورثہ میں حصہ دار ہے اور پھوپہی اس کے ورثہ میں شریک نہیں کہ وہ ذو سہمہ یعنی حصہ دار نہیں۔ اور ہم حضرت عمر علی بن ابی طالب اور ابن مسعود (رض) عنہم سے روایت کرتے ہیں کہ ان حضرات نے فرمایا کہ اس صورت میں جبکہ کوئی اور ذو سہم اور عصبہ موجود نہ ہو تو خالہ کو ایک تہائی اور پھوپھی کو دو تہائی ترکہ ملے گا۔ رہی وہ روایت جو اہل مدینہ بیان کرتے ہیں۔ اسے مخالف رد نہیں کرسکتے کیونکہ جب ثابت بن دحداح (رض) کا انتقال ہوا اور ان کا وارث کوئی نہ ٹہا۔ تو رسول اللہ (صلی اللہ علیہ وآلہ وسلم) نے ان کے بھانجے ابو لبابہ بن عبد المنذر کو ترکہ دلایا۔ اور ابن شہاب تو پھوپھی، خالہ اور تمام ذی الارحام کو ان کی قرابت کے لحاظ سے ورثہ دلاتے تھے۔ اور وہ اہل مدینہ میں بڑے فقیہ اور روایت کا سب سے زیادہ علم رکھنے والے تھے۔