Al Tahawi: Hadith 1109

١١٠٩: ابو واقد لیثی کہتے ہیں کہ ہمیں ابو ارویٰ (رض) نے بیان کیا کہ میں جناب نبی اکرم (صلی اللہ علیہ وآلہ وسلم) کے ساتھ عصر کی نماز مدینہ منورہ میں پڑھتا پھر میں ذوالحلیفہ کے درختوں والے مقام میں غروب آفتاب سے پہلے آجاتا یہ مقام مدینہ منورہ سے دو فرسخ پر واقع ہے۔ (فرسخ تین میل ہوتا ہے) اس روایت میں یہ آیا ہے کہ ہم عصر کے بعد سورج غروب ہونے سے پہلے دو فرسخ فاصلہ طے کرلیتے۔ اس سے یہ کہنا ممکن ہے کہ یہ پیدل چلنا ہو یا اونٹ یا گھوڑے پر ہو اس کے لیے مندرجہ ذیل روایت کو دیکھنا ہوگا۔
تخریج : مصنف ابن ابی شیبہ کتاب الصلاۃ ١؍٣٢٧۔
حاصل روایات : اس روایت سے یہ بات معلوم ہوئی کہ ابو ارویٰ (رض) عصر کے بعد دو فرسخ کا سفر کرتے اور ابھی تک سورج غروب نہ ہو پاتا اس روایت میں یہ دونوں احتمال ہیں کہ پیدل چل کر جاتے یا سوار ہو کر مگر روایت محمد بن اسماعیل بن سالم الصائغ نے پہلے احتمال کو متعین کردیا وہ روایت ملاحظہ ہو۔