Al Tahawi: Hadith 1671

١٦٧١ : کریب نے بتلایا کہ میں نے ابن عباس (رض) کو کہتے سنا کہ میں نے ایک رات جناب رسول اللہ (صلی اللہ علیہ وآلہ وسلم) کے پاس گزاری۔ پس جب آپ عشاء سے واپس لوٹے تو میں بھی آپ کے ساتھ چلدیا۔ پس گھر میں داخل ہو کر آپ نے دو ہلکے پھلکے رکوع والی رکعات ادا فرمائیں ان کے رکوع ‘ سجدے اور قیام تمام یکساں تھے۔ پھر اپنی نماز کی جگہ آپ نے آرام فرمایا۔ یہاں تک کہ میں نے آپ کے خراٹوں کی آواز سنی۔ پھر آپ نے نیند سے بیدار ہو کر وضو کیا اور دو رکعت اسی طرح کی ادا فرمائیں۔ پھر دوبارہ اپنی اسی جگہ آرام فرمانے لگے اور سو گئے ‘ میں نے آپ کے خراٹے کی آواز سنی۔ پھر آپ نے پانچ مرتبہ کیا اور اس طرح دس رکعات ادا فرمائیں ‘ پھر ایک کو ملا کر ان کو وتر بنایا۔ پھر بلال (رض) آگئے اور نماز صبح کی اطلاع دی تو آپ (صلی اللہ علیہ وآلہ وسلم) نے دو رکعت ادا فرما کر نماز کے لیے تشریف لے گئے۔ اس روایت میں یہ اطلاع دی گئی ہے کہ آپ نے دس رکعات ادا فرمائیں اور ایک کو ساتھ ملا کر ان کو وتر بنایا۔ پس اس میں یہ احتمال ہے کہ ان دو آخری رکعات کے ساتھ ایک کو ملا کر وتر اد کیے جن دو رکعتوں کو ادا کرچکے تھے تو وہ اس ایک سے ملکر تین ہوگئیں۔ یہ معنی اس بناء پر کیا تاکہ اس روایت اور علی بن عبداللہ ‘ ابن جبیر اور یحییٰ بن جزار والی روایات کا مفہوم ایک ہوجائے۔ پھر ہم نے غور کیا کہ آیا ان کا اس سلسلہ میں کوئی بیان مروی ہے۔ روایت یہ ہے۔