Al Tahawi: Hadith 1716

١٧١٦ : ابو العوام محمد بن عبداللہ نے اپنے اسناد کے ساتھ ابو الزناد سے نقل کیا کہ مدینہ منورہ کے فقہاء سبعہ ابن المسیب ‘ عروہ ‘ قاسم ‘ ابوبکر بن عبدالرحمن ‘ خارجہ بن زید ‘ عبداللہ بن عبداللہ ‘ سلیمان بن یسار یہ اپنے علاوہ مشائح اور فضیلت و صلاحیت والے فقہاء کے سامنے مسائل بیان کرتے۔ بسا اوقات کسی مسئلہ میں اختلاف کرتے تو پھر ان میں سے اکثریت کے قول کو اور افضل ترین کے قول کو لیتے۔ پس میں نے ان سے اس سلسلہ میں جو یاد کیا وہ یہی تھا کہ وتر تین ہیں اور ان کے آخر میں سلام پھیرا جائے گا۔ پس یہ فقہاء و علماء مدینہ منورہ جن کا ہم نے تذکرہ کیا ان کا اس بات پر اتفاق ہے کہ وتر تین ہیں۔ آخر میں سلام پھیرتے۔ حضرت عمر بن عبدالعزیز (رح) نے ان کی متابعت کی اور کسی انکار کرنے والے نے اس کا انکار نہیں کیا۔ ابن مسیب (رح) کو حضرت سعد (رض) کے وتروں کا علم تھا۔ اس کے باوجود انھوں نے اس کے خلاف فتویٰ دیا۔ اور ان کے عمل سے اس کو اولیٰ گردانا۔ اور عروہ (رح) نے بھی اس کا فتویٰ دیا۔ اور ان سے زہری اور ان کے بیٹے ہشام نے بھی روایت کی جو اسی باب میں گزر چکی۔ یہ ہمارے ہاں ایسا عمل ہے کہ اس کی خلاف ورزی مناسب نہیں اس لیے کہ جناب رسول اللہ (صلی اللہ علیہ وآلہ وسلم) کی حدیث اس کی شاہد ہے۔ اور پھر اس عمل کو آپ کے بعد آپ کے اصحاب (رض) نے بھی اختیار کیا اور ان میں سے اکثریت کے اقوال بھی اس کی تائید میں ہیں پھر تابعین کرام کا اس پر اتفاق ہوگیا۔