Al Tahawi: Hadith 2030

٢٠٣٠: عطاء بن یسار نے زید بن ثابت (رض) سے انھوں نے جناب نبی اکرم (صلی اللہ علیہ وآلہ وسلم) سے اسی طرح روایت نقل کی ہے۔ امام طحاوی (رح) کہتے ہیں کہ بعض علماء نے گزشتہ آثار کی پیروی کرتے ہوئے کہا کہ سورة نجم میں سجدہ نہیں ہے۔ مگر دوسرے علماء نے ان سے اختلاف کرتے ہوئے کہا کہ اس میں سجدہ لازم ہے اور روایات بالا میں سورة نجم میں سجدہ کے نہ ہونے کی کوئی دلیل نہیں ہے۔ اس میں کئی احتمالات ہیں : (١) آپ نے اس وقت سجدہ وضوء کی حالت نہ ہونے کی وجہ سے ترک کیا ہو (٢) وہ ایسا وقت ہو جس میں سجدہ جائز نہ ہو (٣) اس لیے چھوڑ دیا کہ آپ کے ہاں سجدہ کا اس وقت یہ ہو کہ جو چاہے اس کو کرلے اور جو چاہے چھوڑ دے (٤) یہ بھی احتمال ہے کہ اس میں سجدہ اس لیے ترک کیا کہ اس میں سجدہ نہیں۔ جب سجدہ کے ترک میں یہ تمام احتمالات جاری ہیں اور یہ روایت دوسری روایات سے اولیٰ اس وقت تک نہیں ہوسکتی جب تک اس میں ایسی دلالت نہ ہو جو اسے دوسری سے راجح بنا دے۔ لیکن اس کے لیے ان احادیث کو دیکھنا اور تلاش کرنا ہوگا جو اس میں سجدہ کے ہونے نہ ہونے پر دلالت کریں۔ روایات ذیل پر نظر ڈالیں۔
تخریج : نسائی ١؍١٥٢‘ مسلم ١؍٢١٥‘ نحوہ۔
حاصل روایات : ان روایات سے معلوم ہوتا ہے کہ جب جناب نبی اکرم (صلی اللہ علیہ وآلہ وسلم) نے اور صحابہ کرام نے سجدہ نہیں کیا تو سورة نجم میں سجدہ نہیں کیا اور تمام مفصلات کا حکم یکساں ہے۔
جواب دلیل بالا : اس روایت میں ان کے مؤقف کی ہمارے نزدیک کوئی دلیل نہیں اس کی وجہ یہ ہے کہ دلیل میں احتمالات ہیں۔
احتمال نمبر 1: ممکن ہے کہ آپ (صلی اللہ علیہ وآلہ وسلم) نے سجدہ اس لیے چھوڑ دیا ہو کہ آپ وضو کی حالت میں نہ ہوں پس سجدہ نہیں کیا۔
احتمال نمبر 2: اس لیے چھوڑا کہ وہ ایسا وقت تھا جس میں سجدہ درست نہیں۔
احتمال نمبر 3: اس لیے چھوڑا کہ سجدہ تلاوت کا حکم آپ کے ہاں یہ ہو کہ جو چاہے سجدہ کرے جو چاہے چھوڑ دے۔
احتمال نمبر 4: آپ نے اس لیے چھوڑا ہو کہ اس سورت میں سجدہ نہیں۔ جب اس روایت میں یہ چاروں احتمال یکساں طور پر ثابت ہو رہے ہیں تو کسی ایک احتمال کو ترجیح دینے کے لیے دلیل راجح کی ضرورت ہے۔
تعین احتمال کے لیے دلیل کی تلاش :
ہم نے ایک احتمال کے متعین کرنے کے لیے دلیل کی تلاش کی تو ایسی روایات مل گئیں جو سورة النجم میں سجدہ کو ثابت کرتی ہیں چنانچہ ملاحظہ ہو۔