Al Tahawi: Hadith 2550

٢٥٥٠: ابو عطفان بن ظریف نے حضرت ابوہریرہ (رض) سے نقل کیا ہے کہ جناب رسول اللہ (صلی اللہ علیہ وآلہ وسلم) نے فرمایا تسبیح مردوں کے لیے اور تصفیق عورتوں کے لیے ہے اور جس نے نماز میں ایسا اشارہ کیا جو مقصد کو ظاہر کرتا ہے وہ نماز کا اعادہ کرے۔ بعض علماء اس طرف گئے ہیں کہ جب کوئی شخص نماز میں ایسا اشارہ کرے جو سمجھا جاتا ہو تو اس سے نماز ٹوٹ جائے گی۔ انھوں نے اس پر کلام والا حکم لگایا اور انھوں نے اس حدیث سے استدلال کیا ہے۔ ان سے اختلاف کرتے ہوئے دوسرے علماء نے کہا کہ اشارہ نماز کو نہیں توڑتا۔ ان کی دلیل ذیل کی روایات ہیں۔
تخریج : روایت نمبر ٢٥٣٥ کی تخریج ملاحظہ کرلیں۔
حاصل روایات یہ ہے کہ ایسا اشارہ جس سے مقصد معلوم ہوجائے وہ نماز کو فاسد کردیتا ہے اور اشارے جس کا حکم کلام سے کمتر نہیں ہے۔
خلاصہ الزام :
نمبر 1: نماز کے دوران سلام اور دیگر امور کے لیے اشارہ جس سے مخاطب کو مقصد سمجھ آجائے یہ اہل ظواہر کے ہاں کلام کے حکم میں ہے اور مفسد صلوۃ ہے۔
نمبر 2: ائمہ اربعہ کے ہاں مفسد صلوۃ تو نہیں ہے البتہ مکروہ ضرور ہے۔
فریق اوّل کا مؤقف اور دلیل : ایسا اشارہ جس سے اشارہ کا مقصد معلوم ہوجائے وہ مفسد صلوۃ ہے اور اس سے نماز فاسد ہوجاتی ہے اعادہ ضروری ہے جیسا اس روایت میں ہے۔
فریق ثانی کا مؤقف اور دلائل : اشارہ کرنے سے نماز تو نہیں ٹوٹتی البتہ مکروہ ضرور ہے دلیل یہ روایات ہیں۔